Kryeministri Edi Rama zhvilloi sot sesionin e dhjetë të bashkëbisedimit me aplikantë të nismës “Gati për Shqipërinë”, ku vijuan prezantimet e tyre.
Rama tha se “ky cikël sesionesh online sipas fushave, na mundëson njohjen me të interesuarit dhe eksplorimin së bashku të mundësive e formave të bashkëpunimit me ta”.
Ndërkohë, ai theksoi se aplikimet vazhdojnë të priten në adresën ga***************@kr***********.al.
Kryeministri Rama theksoi se “sot kemi sesionin e dhjetë të këtij procesi. Këtu jam bashkë me ministren e Shëndetësisë, Ogerta Manastirliu, kryetarin e Komisionit të Veprimtarisë Prodhuese, Ilir Beqaj, sekretaren e Komitetit Kombëtar të Territorit, që është njëkohësisht drejtore e Agjencisë së Zhvillimit të Territorit dhe zv/ministren e Arsimit, Bora Muzhaqi, e cila është edhe koordinatorja e këtij projekti. Prania ime është për t’iu falënderuar dhe shprehur respektin për hedhjen e këtij hapi, por edhe mirënjohje për besimin sepse në fund të fundit është një shprehje besimi kjo. Shpresoj të mos zhgënjeheni”, – tha Rama.
Suida Arci nga Shkodra, jeton aktualisht në Romë ku është diplomuar në Fakultetin e Mjekësisë dhe Kirurgjisë. “Jam shumë entuziaste për projektin “Gati për Shqipërinë” ndaj e ndiej si detyrim të jap kontributin tim me eksperiencën e fituar në vite. Spitali ku unë punoj ka qenë hapi i dytë për pacientët COVID, në rajonin e Lacios që në mars të 2020″.
Një tjetër aplikant Erand Mati tha se “kam mbaruar studimet e larta për farmaci si dhe studimet në doktoraturë ku kam marrë titullin ‘Doktor i Shkencave farmaceutike’ në Universitetin e Bukureshtit. Aktualisht jam drejtor i departamentit të kërkimit dhe zhvillimit shkencor për prodhimin e barnave në një fabrikë farmaceutike. Mund të kontribuoj në Shqipëri”.
Amarildo Çelaj u shpreh se “kam mbaruar Universitetin e Tiranës për Mjekësi të Përgjithshme. Mënyra si unë doja të kontribuoja për projektin “Gati për Shqipërinë” është me anë të dixhitalizimit të të dhënave mjekësore të pacientëve në një spital dhe konkretisht në QSUT”.
g.kosovari
