Pas vizitës në Bruksel, Kryeministri Edi Rama ka informuar grupin parlamentar të Partisë Socialiste për takimet që zhvilloi me zyrtarë të Bashkimit Europian.
Gjatë fjalës së tij në mbledhjen e përbashkët të qeverisë me PS, Rama i bëri thirrje sërish Partisë Demokratike që të zgjedhin së bashku Prokurorin e Përgjithshëm të përkohshëm.
“Për të zgjedhur prokurorin e përgjithshëm të përkohshëm, gjë që është mbështetur qartësisht nga partnerët tanë ndërkombëtarë, nuk do të rresht së përsëritur deri në sekondën e fundit ftesën për opozitën që të bëhet pjesë e këtij procesi sepse nuk mundet që afazi të fillojë gjithmonë nga e para sa herë ka një hap për të bërë në zbatimin e reformës në drejtësi”, theksoi Rama.
Megjithatë, Kryeministri bëri të qartë se Partia Socialiste do të zgjedhë e vetme me shumicë të thjeshtë kryeprokurorin e përkohshëm nëse opozita nuk merr pjesë në dialog të përbashkët për këtë çështje.
“Nëse opozita nuk kontribuon në interes të vendit, do të zgjedhim me shumicë të thjeshtë kryeprokurorin”, u shpreh Kryeministri Edi Rama.
a.ç
