Kryeministri, njëherësh kryetari i Partisë Socialiste, Edi Rama zhvilloi sot takimin elektoral përmbyllës për qarkun Dibër.
Në një postim në rrjetet sociale, Rama ndau një fotografi ku shfaqet me drejtuesin politik të këtij qarku, Blendi Klosin, këngëtarin Noizy dhe tre të rinj të tjerë.
“Ata ishin pesë. Dhe Dibra ishte flakë”, shkruan Rama duke iu referuar numrit 5 që mban Partia Socialiste në fletën e votimit.
Në takimin me mbështetësit e PS-së, Rama theksoi rëndësinë e veçantë të zgjedhjeve të 11 majit, ndërsa tha se kjo forcë politike nuk është qëllimi, por mjeti për të shkuar para drejt BE-së.
“PS dhe PD nuk janë çështja kryesore e 11 majit. Çështja kryesore është një shpresë e re për Shqipërinë me BE, në Evropë, apo Shqipëria e gjitha pas një plaku të pashpresë, të lodhur dhe të mbaruar që nuk di ku e vuri kryefjalën dhe ha rrugës kallëzuesin. Kjo është zgjedhja! Midis të mirës së përbashkët të një populli të tërë dhe interesit të një grushti njerëzish. Rruga e Arbrit nuk është rruga e socialistëve, por e socialistëve, e demokratëve, sepse mbi të gjitha është rruga e dibranëve, bulqizakëve, matjanëve. Prandaj, në 11 maj nuk duhet shkuar me fanellë partie, por me flamurin kuqezi”, pohoi Rama.
