Kryeministri Edi Rama i ka kërkuar sot deputetëve socialistë që të shmangin çdo lloj tensioni në seancën e të enjtes në Kuvend, kur opozita të kërkojë debat për ngritjen e komisionit të reformës zgjedhore.
Gjatë një mbledhje me ministrat, kryesinë dhe grupin e Partisë Socialiste është diskutuar koordinimi i axhendës parlamentare.
Një pikë e rëndësishme e mbledhjes ishte diskutimi për Reformën Zgjedhore. Kryetari i PS, Edi Rama ka kërkuar që të enjten të ketë një debat konstruktiv dhe të shmangen përplasjet me opozitën.
Sipas kryeministrit do të respektohet fryma e marrëveshjes së 18 majit për konsensus dhe bashkëpunim me opozitën. “Të bëjmë debat konstruktiv. Duhet të shmangim sa më shumë të jetë e mundur përplasjen. Të respektojmë frymën e 18 majit për konsensus dhe të bashkëpunojmë me opozitën,” mësohet të ketë thënë Rama.
Bashkëkryetari i reformës Bledi Çuçi u ka kërkuar deputetëve socialistë që të përgatiten për debat ditën e enjte. Ndërsa kryetari i grupit, Balla ka kërkuar që të mos ketë mungesa nga deputetët në seancë dhe debati të jetë konstruktiv.
Kujtojmë që seanca e së enjtes së kaluar u bllokua nga PD, pasi opozita kërkoi debat për Reformën Zgjedhore. Një tjetër pikë diskutimi ishte ajo për pakicat, ku ministri për Punët e Jashtme dhe Europën, Bushati ka theksuar dakordësinë me dy partitë e tjera dhe kalimin kete jave ne Kuvend.
a.ç
