Hotelet duhet të zbrazen pas vitit të ri. Kështu deklaroi kreu i qeverisë Edi Rama në mbledhjen e fundit në kushtet e jashtëzakonshmërisë. Rama tha se hapja dyerve duhet të jetë shumë e kujdesshme sepse duan të qëndrojnë në hotel për festa edhe nëse nuk kanë dëme nga tërmeti.
Ai u shpreh se ka dy opsione për ata që i janë dëmtuar shtëpitë: të marrin paratë dhe të gjejnë një shtëpi me qira derisa të mbarojë ndërtimi i shtëpive, ose të futen në shtëpitë me qira që i gjen shteti, ndërsa u shpreh se për ta është parashikuar edhe një fond shtesë për transportin.
Kryeministri deklaroi se do të nisë blerja e apartamenteve, ndërsa shtoi se do të negociohet me pronarët e apartamenteve stok për çmime të ulëta, pasi siç tha ai, ky nuk është rasti për të bërë tregti.
Rama tha Fondi Shqiptar i Zhvillimit bashkë me bashkitë duhet të përgatisin një raport me zonat ku do ndërtohet për të bërë verifikimin me hipotekë të çdo prone dhe se raporti duhet të jetë gati javën e ardhshme. Ai u shpreh se Komiteti Kombëtar për Rindërtimin do të mblidhet ditën e hënë për ta ndarë punën me organizatat që të dislokohet fondi i tyre. Kreu i qeverisë deklaroi se po vijon mbledhja e dokumentacionit për hetimet për 155 objekte të futura në kategorinë e rrezikut.
Rama rikujtoi edhe njëherë afatin 15 Dhjetor për strehimin në banesa të atyre që kanë humbur familjarët nga tërmeti i 26 Nëntorit. Ai u shpreh se të gjithë ata që kanë pasur shtëpinë në pallatet e shembura do sillen në Tiranë, pasi kanë përjetuar momente tmerri dhe nuk mund të qëndrojnë atje.
Kryeministri nuk ka pa shigjetuar edhe sot organizaten kriminale sic e ka quajtur ai, ‘KÇK’, ‘Kap Ça të kapësh’, duke theksuar se pavarësisht faktit që ajo mund të jetë tokë shtetërore, mund të ketë raste që mund të jetë grabitur.
“I jemi referuar pronës tokë-shtet, por KÇK ka bërë të veten, në kohën kur kemi bërë punë të tjera në gjithë këtë kohë dhe duhet verifikuar në hipotekë çdo pronë. Që mos të gjendemi me surpriza, kur të shohim që është tokë e cënuar dhe e kafshuar nga KÇK. Raporti duhet të jetë gati javën që vjen”, tha Rama.
g.kosovari
