Kryeministri Edi Rama ka përshëndetur themelimin e Confindustria Albania, duke u shprehur se Shqipëria ka mësuar shumë nga Italia në fushën e biznesit.
“Sipërmarrësit italianë kanë njohuri për gjithçka. Ndërmarrjet e huaja sjellin kulturë bizensi”, tha Rama në takimi. “Pa sipërmarrësit italianë, niveli i njohurive të biznesit në Shqipëri do të ishte më i ulët”.
Kryeministri e cilësoi Italinë si një partner të rëndësishëm ndërkombëtar, shkëmbimet tregtare me të cilin janë rritur. Sipas Ramës, në Shqipëri janë 2000 ndërmarrje italiane të regjistruara.
“Italia është partneri më i rëndësishëm tregtar për Shqipërinë, e këtë e tregojnë edhe shkëmbimet në nivele shumë të larta mes dy vendeve. Në vendin tonë kemi rreth 2.600 ndërmarrje italiane të regjistruara, por e rëndësishme është që ne të presim më shumë sipërmarrje italiane në vendin tonë”, theksoi ndër të tjera Rama.
Rama tha më tej se vendi i është futur një procesi reformash të dhimbshme, por të domosdoshme, e mbi të gjitha përmendi atë të liberalizimit të përgjithshëm të tregut të energjisë, sektor ky që sipas të dhënave qeveritare është stabilizuar ndjeshëm pas masave të ndërmarra nga qeveria.
“Modeli ekonomik i bazuar te remitancat për ne tashmë është i ezauruar, ndaj dhe u desh që në fillim që të ktheheshim te një model i ri ekonomik i bazuar te prodhimi. Ky është një moment i rëndësishëm për ekonominë tonë, pasi po ngrejmë një model të bazuar mbi burime të qëndrueshme”, deklaroi kryeministri Rama.
Kreu i qeverisë nuk la pa përmendur edhe faktin që, prej vitit 2013, numri i italianëve që kanë vizituar Shqipërinë është rritur me 40%.
D.I.
