Në një bashkëbisedim në Insitutin Mbretëror të Marrëdhënieve Ndërkombëtare në Britaninë e Madhe, Kryeministri i vendit Edi Rama u pyet dhe për Kosovën dhe se a mund të bëjë Shqipëria diçka më shumë për ta ndihmuar.
Rama u shpreh se Kosova është një vend simotër dhe se jemi një komb që jeton në dy shtete. Kreu i qeverisë korrektoi gazetarin britanik dhe për emërtimin e shtetit të Kosovës, duke theksuar se “Kosovo” e cilësojnë serbët.
Pyetje: Kam qenë në Shqipëri dhe Kosovo një sërë herësh, unë mbështes shumë atë që ju thatë për Kosovën, por do doja t’ju pyesja a mendoni se Shqipëria ka një rol të posaçëm për të ndihmuar sepse konsiderohet si një fqinjë miqësore. A mendoni se mund të bëni më shumë?
Edi Rama: Së pari është Kosova jo Kosovo. Kosovo është mënyra se si e thërrasin serbët, kështuqë ju avokatoni për pavarësinë e Kosvës dhe ju lutem të kërkoj me përulje nuk është faji juaj që propaganda ka bërë punën e vet. Dhe unë ndonjëherë them Kosovo, por është Kosova.
(Gazetari kërkon ndjesë)
Edi Rama: Jo jo, mos kërko ndjesë! Edhe unë e bëj ndonjëherë, por është Kosova. Kosova nuk është vend mik është vend simotër, sivëlla, është gjithçka, ne jemi njësoj dhe për arsye të caktuara jemi një komb që jeton në dy shtete. Ne shqiptarët kemi dy shtete, 4 kryeministra në Ballkan, diçka nuk duhet të funksionojë, por ja që kështu është. Ne bëjmë gjithçka mundemi që të ndihmojë, sigurisht mirëpresim gjithçka ata bëjnë për ne për të na ndihmuar. Ne jemi njësoj, kemi një kufi dhe disa rregulla për të respektuar, por jemi njësoj. Nuk e di se çfarë kishin ekzaktësisht në mend kur pyetët.
/a.r
