Përmes një postimi në rrjetin e tij social, kryeministri Edi Rama ka rikutjuar Ali Pashën Tepelenën dhe 195 vjetorin e vrasjes së tij. E teksa Rama e quan Ali Pashën si “Luanin e Janinës” më pas ai shton se ishte lëvizja e tij që frymëzoi në njëfarë mënyre revolucionin në Greqi, i cili u pasua me shpalljen e pavarësisë… një fjali e cila pa mëdyshje mund të konsiderohet dhe si një “provokim” i rradhës drejtuar Greqisë.
Pak muaj më parë, kur tema e prishjes së disa ndërtesave të komuniteti grek në Himarë ishte çështja e nxehtë e ditës, përmes një postimi të ngjashëm, kryeministri do të hidhte fotot e Akropolit, duke shtuar se ai ishte në këmbë falë një shqiptari (Gjergj Dushmanit).
Ai postim do të sillte një reagim jo të lehtë nga ana e palës greke e cila do të akuzonte Ramën për shumë gjëra, ndër to se ishte dhe një kukull e Presidentit turk Erdogan.
STATUSI
195 vjet më parë jepte shpirt, jo në shtrat por duke luftuar, Ali pashë Tepelena, Luani i Janinës.
Si personalitet historik, Ali pasha është ndoshta nga të rrallët që përgënjeshtron postulatin e gjithpranuar se historia u jep të drejtë fitimtarëve. Zjarri që ndezi gjeniu gjakësor i vezirit të Toskërisë, e shkrumboi aq keq rretherrotull pushtetin e establishmentit osman, sa në letrat e shkëmbimeve diplomatike, ai cilësohej si “plaga më e tmerrshme e perandorisë”.
Revolucioni grek, revoltat në Bullgari dhe në principatat danubiane që përfunduan të tëra me mëvetësinë e atyre kombeve, i detyrohen jo pak Ali pashës në përgatitjen e tyre sociale, ushtarake e shpirtërore.
Shumë i detyrohet Ali pashës edhe ndërgjegjësimi i krerëve shqiptarë, të cilët gjatë mesit të parë të shek. XIX, filluan ta konceptonin përfshirjen në çështjet kombëtare, siç e thotë bukur mirë studiuesi Dritan Egro, “përtej interesit të çifligjeve të tyre”.
Figura e pashait që tronditi Portën e Lartë mbetet padyshim një nga figurat më të diskutueshme të historisë sonë, por çka nuk është diskutuar as nga detraktorët e tij më të mëdhenj, është gjenialiteti i këtij kryeneçi të madh shqiptar.
