Fillimisht Rama u ndal tek rasti i Egli Prodës në Pogradec, për të cilin kryeministri tha se nuk janë dashur 40 minuta që ambulanca të mbërrijë në vendngjarjen e krimit, por 7 minuta. Për këtë gjë, kreu i qeverisë u shpreh se është e verifikueshme në regjistrin apo në bankën e të dhënave elektronike që ka njësi të koordinimit.
“Ne mund ta ngremë në një nivel tjetër të sistemit të urgjencave në përgjithësi. Nuk kam për ta harruar asnjëherë se çfarë u tha, e çfarë kanë dëgjuar gjithë këta njerëz, që për mua janë heronj, heronj të heshtur të jetës së përditshme. Në rastin e Pogradecit, që u bë telenovelë në mënyrë të qëllimtë nga burimet e medias dhe politikes, dhe iu tregua shqiptareve një gënjeshtër shumë të madhe që mori proporcione shumë të mëdhaja, në një kohë shumë të shkurtër, e një nga elementët e gënjeshtrës ishte që urgjenca ishte vonuar 40 minuta. Nuk ndodh dhe për fat të mirë sot çështja e llogaridhënies dhe e transparencës së urgjencës kombëtare, nuk është çështje opinionesh apo tregimesh, çfarë tregon njëri, çfarë tregon tjetri. Është e gjitha në regjistrin, ose në bankën e të dhënave elektronike që ka njësi të koordinimit. Ti mund të shkosh e mund ta verifikosh në kompjuter rastin specifik kur erdhi thirrja, kush e mori thirrjen, kur e dha urdhrin për të nisur misionin, kur u nis misioni, kur arriti në përfundim. Faktikisht, nëse unë e mbaj mend mirë, ka qenë 7 minuta. Jo për 40 minuta. U ngritën gjithë qenëria nga një lehje e madhe siç ndodh çdo natë, sepse në fakt ne jemi rritur me qentë e lagjes natën që lehnin. Tani s’ka më, nga ata që lehin jashtë penxhereve, janë këta që lehin tek penxherja e televizorit, dhe u qorrollis gjithë mileti. Tani është koha që këtë eksperiencë… në këtë eksperiencë të përfshijmë të tjerët.”, tha Rama.
Më tej, Rama përmes një anekdode, bëri dallimin e Urgjencës Kombëtare para dhe pas qeverisjes socialiste. Ai tha se dikur ekzistonte perceptimi që ky shërbim shtetëror duhet të paraqitet si “leckaman”, dhe se njerëzit habiteshin kur i shihnin stafin me uniformat e reja, pasi i ngatërronin me shërbimin privat.
Më tej tha se sot ambulancat nuk mbesin mes rrugës nga defekte teknike si dikur. Kryeministri e cilësoi si krenari të gjithë transformimin e Urgjencës Kombëtare.
“Do ta mbyll me një anekdotë të jetuar të doktorin, që në fillim. Ku urgjenca mori uniformat që ka sot, kishte problem me qytetarët që e thërrisnin urgjencën se kur hapnin derën shihnin këta me uniformë, e i mbyllnin derën thoshin nuk kemi thirrur privatin, kemi thirr shtetin. Se shteti duhej të paraqitej si leckaman atje, kurse kjo paraqitje nuk ishte paraqitje me të cilën ishin mësuar që të shihnin shtetin dhe kjo i thotë besoj, që të gjitha ato që kanë ndodhur me Urgjencën Kombëtare. Është realisht një nga krenaritë e reformave që kemi bërë. Është krenari për mënyrën se si është transformuar në një histori suksesi, nga një histori turpi. Është krenari për mënyrën se si është transformuar nga pikëpamja e burimeve njerëzore, se si është harmonizuar eksperienca e atyre që patën fatin të mos dalin në pension pa e parë një herë një ambulancë që funksionon nga fillimi deri në fund, edhe që kur të shkojnë… ai shoferi kishte emocione që i del një herë në jetë, por jo emocione që i fiket makina rrugëve edhe nuk shkon dot të shpëtoje tjetrin siç ka pasur në të kaluarën. Është krenari që sot kemi një urgjencë kombëtare që nuk i lë gjë mangët edhe pse ka gjëra që mund e do t;i bëjmë më mirë, nuk i lë gjë mangët urgjencave të vendeve të tjera.”, tha Rama.
Në rrjete sociale, kreu i qeverisë shkruan se deri më sot, flota e autoambulancave është trefishuar dhe janë të pajisura me aparatura moderne, për të garantuar ndërhyrje të shpejtë e të sigurt. Po kështu ai shkruan se janë realizuar mbi 800 mijë misione.
