Kryeministri Edi Rama ka folur sot në takimin për Universitetet ku marrin pjesë studentë, rektorë dhe dekanë.
I ashpër me pedagogët, shefi i qeverisë tha se duhet një transparencë dhe trupa akademike s’duhet të presë ditën që ai të bashkohet me studentët.
“Ne po bëjmë detyrat tuaja. Duhet të kishit bërë me kohë transparencën e titujve” – tha Rama ndër të tjera duke iu referuar doktoraturave.
Ai u shpreh se problemi real i fakulteteve nuk është ngujimi i studentëve, por vetë pedagogët. Sipas Ramës, ata duhet të japin mësim qoftë edhe për një student të vetëm në auditor.
“Pyetje ime është, se kush e ka penguar universitetin gjithë këto vite t’i drejtohet qeverisë? Ne presim që ju të gjeneroni të ardhurat. Ndërsa të ardhurat po gjenerohen nga shteti dhe prindërit e studentëve” – tha Rama.
Ai pati edhe një apel të fundit teksa tha se do të mbajë çdo përgjegjësi që i takon. Ai tha se qeveria nuk mund të bëjë punën e universiteteve, por vetëm t’u garantojë atyre fuqinë që u jep ligji.
“Jam i gatshëm të mbaj të gjitha përgjegjësitë që më takojnë pëballë studentëve. Qoftë edhe për borën që bie. Por për budalla mua njeri nuk më bën dot” – tha shefi i ekzekutivit.
“I mirëpres të gjitha kërkesat, ama një gjë duhet të jetë e sigurt: duhet të ndajmë kush bën çfarë. Studentët e bënë të tyren, e ngritën zërin, ne i dëgjuam. Nuk e di sa kanë dëgjuar universitetet, nuk dua të flas, kjo shfaqje me shumë fytyra duhet të mbarojë një orë e më parë.
Ne sot po bëjmë një punë që duhet ta kishin bërë universiteti, por po e bëjmë sepse nuk duam të bëjmë top ping-pongu fëmijët tanë. Këta janë fëmijët tanë. Prandaj ju profesorë ndajeni mendjen, do t’i japim fund doktorëve të shkencave që vetëm me shkencën nuk kanë lidhje?!
Qeveria nuk ka punë të bëjë vetting akademik. Me ligjin e arsimit të lartë duhet ta kishit bërë. Nuk duam polemika dhe asnjë konflikt. Për budalla njeri mua nuk më bën dot. Kaq” – tha ndër të tjera Rama.
/a.rada
