Kryeministri Edi Rama ka vijuar turin e tij të mbylljeve të takimeve elektorale për zgjedhjet vendore, në qytetin e Librazhdit. Në fjalën e tij kryeministri Rama ftoi qytetarët që të votojnë kandidatin e mazhorancës Kastriot Gurra, duke shtuar se pas 21 qershorit për Librazhdin do bëhet më shumë se në 25 vite bashkë.
Sipas Ramës, Partia Demokratike ka humbur rrugën pas zgjedhjeve të 23 qershorit të vitit 2013, ndërsa tashmë është kthyer avokate e pushtetit të kaluar të cilën 1 milionë shqiptarë e rrëzuan.
“Si asnjë herë më parë familjet që jetojnë në fshat do të kenë më në fund derën ku të trokasin. Aleanca e Shqipërisë Evropianë është më e vendosur se kurrë për të bërë realitet shtetin që shqiptarët kanë nevojë. PD pasi e rinoi shtetin dhe pasi mori atë që meritonte në zgjedhjet e kaluara, ka dy vjet që nuk merr dot veten dhe bën avokatin mbrojtës të atij pushteti që ishte. Ky dallim është i qartë këtu, midis Kastriotit, një djali shumë energjik dhe administratori shumë të aftë. E kam njohur kohë më parë dhe kam pasur mundësi ta vlerësoi dhe në opozitë dhe në qeverisje. Kandidati tjetër të vazhdojë në Elbasan si pediatër, pasi s’kemi luksin të humbasim një mjek, se nuk duam një të paaftë në krye të bashkisë. Me Kastriotin dhe deputetët, me Taulantin, deputetin model për shërbimin ndaj komunitetit të tij, pas 21 qershorit, do bëjmë për Librazhdin çfarë nuk është bërë për 25 vjet.”, tha Rama
