Kryeministri Edi Rama deklaroi të enjten në Kuvend se, “të bësh politikë me krimin është njëlloj si të bësh lobimin e krimit dhe opozita këtë po bën për 4 vite me radhë”.
Kryeministri Rama reagoi pas deklaratës së Bashës për situatën e krimit në vend, duke theksuar se “deklarata të tilla janë kundërvënie ndaj projektit të Europës”. Sipas tij, “me këto deklarata po bëhet qesharake roli i opozitës”.
“Krimin duhet ta neverisim të gjithë bashkarisht. Kujt i shërbeni me deklarata të tilla? Jam absolutisht i bindur se ju mund të bëni shumë më tepër për këtë vend dhe jam absolutisht në dispozicion për të pranuar kontributin tuaj në luftën kundër krimit. Asnjëherë s’e kam thënë që ne triumfuam përfundimisht mbi krimin, sepse kjo është një betejë që vazhdon”, tha Rama.
Duke iu drejtuar deputetëve të opozitës, Rama u shpreh se “do ta shikoni hap pas hapi përgjigjen reale konkrete në terren ndaj krimit”.
