Kryeminsitri Edi Rama duket se ka qenë i prerë për vijimin me projektin për Teatrin Kombëtar që parashikohet të ngrihet pas shembjes së ekzistuesit.
Gjatë aktivitetit ku u përuruan sallat e reja te “Turbina”, Rama tha se nuk u takon aktorëve të merren me godinën, por profesionistëve.
“Teatri Kombëtar është në ndërtim rrënjësor. Mjafton të shohësh Teatrin, Muzeun, që ende nuk është vënë dorë për t’u ndjerë mirë. Por janë mjaftë që gojtoret e shqyera të baltës të qepen. Të më falni edhe pak, që përpara se të hapen dyert e kësaj skene se pyetja e vërtetë që duhet bërë nëse duhet të ruhet ngrehina absurde e teatrit? Jo nuk është kjo pyetja e vërtetë dhe nuk ka asnjë sens që ta kërkojnë aktoret. Ata s’kanë se si të marrin të drejtën e vendimmarrjes për ruajtjen e godinës së re apo të ruaj të vjetrën. Ajo nuk është pronë private, por mjedis i publikut. I takon vendimmarrëseve të votuar nga qytetarët, që të marrin vendimin. Të flitet për godina s’janë aktorët, e regjisorët, por arkitektet dhe ndërtuesit. S’ka debat a duhet apo s’duhet. Godina e Teatrit Kombëtar mund të jetë dhe mund të mos jetë pjesë e historisë së teatrit. Në rastin tonë nuk është”, tha Rama.
“Nuk është pyetja a duhet prishur Teatri Kombëtar, ajo godinë ku sot nuk e bën një festival kombëtar, jo më rajonal, është e degraduar.
Pyetja është çfarë duhet bërë për të mbushur gropat e mëdha të ikjeve pa fund të aktorëve të mëdhenj, Kadri Roshit, Sulejman Pitarkës, Bujar Lakos dhe me radhë, se kur e shoh sot Robert Ndrenikën në tryezat për të ardhmen e godinës, më shumë se çfarë mendon ai për godinën mua më pikëllon dukja e tij prej mohikani të fundit, e një historie talentesh të mëdha, avacionesh të pafundme.
Ndërkohë që nuk i shquan sot se ku janë trashëgimtarët e fronit të Ndrenikës.
Kjo është pyetja e vërtetë që do të meritonte një debat shumë serioz”, tha Rama.
Ndërsa për “Turbinën”, kryeministri deklaroi se tashmë kjo godinë i është kthyer artistëve. Ai theksoi se tashmë në këtë godinë do të ketë dy salla.
“Turbina” është ndërtuar në mjedisin e rrënuar të ish-Laboratorit të Hidrologjisë, në Tiranën e Re, pranë gjimnazit “Petro Nini Luarasi”, ndërsa deri në ndërtimin e Teatrit të ri Kombëtar kjo qendër do të jetë vendi ku institucioni do të realizojë projektet e tij.
/a.m.
