Teksa kryeministri Edi Rama ka marrë fjalën në foltore, opozita është larguar nga salla e Kuvendit në shenjë proteste.
Por shefi i qeverisë ka replikuar me deputetin Sali Berisha teksa pati një mesazh të koduar për të.
“Lëreni doktorin se ka hall sot. Sali ta qaj hallin që ke për mesazhin që ke marrë sot…” – tha Rama.
Ndërkohë që duke iu përgjigjur akuzave të Bashës, Rama tha se socialistët sot janë më të fortë se një muaj më parë.
Duke iu referuar emrave të ministrave të rinj, kryesocialisti tha se sot ka më shumë forca në Kuvend dhe në terren.
“Partia Socialiste është ndryshe nga partitë e tjera. Basha iu drejtua ministrave me shprehje të neveritshme. Ju kërkoj të mos hidhni baltë mbi ministrat e rinj. Këta vranë katër persona 8 vite më parë dhe janë akoma të karikuar nga idea se drejtësia nuk do të vijë” – tha Edi Rama në Kuvend.
Ai u shpreh se 21 Janari është ende një plagë e pa mjekuar, por sipas tij Shqipëria e sotme është ndryshe nga çfarë ishte për shkak të reformës në Drejtësi.
“Gjykatësit e 21 Janarit sot janë rrugëve dhe nesër do të jenë pas hekurave” –tha Rama.
Rama ironizoi Kryemadhin teksa tha se nuk do t’ia përmendë as emrin.
“Doktorja e Shkencave që hedh fall, u thotë shqiptarëve sesa muaj jetë më ka ngelur mua. Unë nuk e di sa muaj apo vite jetë kam, por di që sa të jetë Partia Socialiste këta nuk vijnë kurrë në pushtet” – tha Rama.
***
Kuvendi i Shqipërisë ka nisur sot seancën e paralajmëruar, duke çelur kështu sesionin e ri. Po sot, pritet të votohet edhe emërimi i Edi Ramës si ministër i Evropës dhe Punëve të Jashtme.
Në fjalën e hapjes, kryeparlamentari Gramoz Ruçi u ndal tek krijimi i instucioneve të reja të Drejtësisë.
Ai u shpreh se nga procesi i Vettingut u konfirmuan deri më sot 48% e subjekteve. Ai bëri një rezyme të Reformës në Drejtësi teksa u shpreh se rruga për krijimin e Gjykatës Kushtetuese është e hapur.
Sipas Ruçit, prezenca e opozitës në sallë e bën të vështirë debatin politik, por edhe produktiv.
Ai kërkoi më shumë durim dhe vullnet për të bashkëpunuar që të shfrytëzohet shanci i dhënë nga Bashkimi Evropian.
“Mjaft e kemi penguar apsiratën e Shqiptarëve. Reforma Zgjedhore vijon të qëndrojë në krye të axhendës parlamentare. Është përgjegjësia jonë që zgjedhjet vendore të 30 qershorit të jenë të lira dhe të ndershme. Prandaj të mbledhim të gjithë mendjen dhe të realizojmë reformën, sipas rekomandimeve të OSBE” – tha Ruçi ndër të tjera.
Kreu i Kuvendit kërkoi bashkimin e vullnetit dhe të energjive mes partive politike pa kushte.
/javanews/a.rada
