(Update) Në një intervistë për gazetarët, Kryeministri Edi Rama ka vlerësuar punën e bërë nga qeveria që ai drejton përgjatë këtyre dy viteve. Në fjalën e tij shefi i qeverisë shqiptare, u shpreh se falë masave të marra, Shqipëria është në rrugën e duhur për rimëkëmbjen ekonomike.
Në këtë drejtim, Rama nënvizoi se nuk do të ketë ndryshime në qeveri, as vitin tjetër parlamentar por edhe gjatë mandatit të parë qeverisës të mazhorancës.
Ndërsa sa i përket dekriminalizimit dhe vëmendjen që ka marrë sërish kjo çështje pas publikimit të raportit të DASH, Rama është shprehur se asnjë kandidat për deputet apo për kryetar bashkie i kandiduar nga PS nuk është me rekorde kriminale.
Rama: Ekonomia me trend pozitiv, shlyem 641 milionë dollarë borxhe
Kryeministri Edi Rama në një konferencë për shtyp përpara gazetarëve ka vënë në fokus nismat ekonomike të qeverisë që ai drejton. Në fjalën e tij kryeministri Rama ka theksuar se në dy vite të qeverisjes që ai drejton, Shqipëria ka ndjekur trendin pozitiv të rritjes ekonomike, falë edhe mbështetjes së FMN-së.
Në këtë kuadër, shefi i qeverisë tha se Shqipëria ka qëndruar në harmoni me parashikimet e programit të hartuar me FMN-në dhe Bankën Botërore, duke u mbyllur me rritjes 2.82% në fund të 2014-s.
“Ekonomia u mbyll me rritje 2.82% në fund të 2014-s. Ndërsa në fund të 2015 do të jemi pranë rritjes prej 3 për qind”, ka deklaruar Rama.
Ndikimi në trendin pozitiv të ekonomisë sipas Ramës ka pasur edhe shlyerja e 641 milionë dollarë borxhe ndaj kontraktorëve.
“Ky qe një proces me ankesa për korrupsion zero, pasi metoda e përdorur, duke shlyer detyrimet në bazë të një radhe të papërcaktuar nga qeveria dhe dëshirat e Ministrisë së Financave, por e caktuar nga koha e krijimit borxheve ka garantuar që procesi të jetë i pakontestueshëm”, tha Rama.
Për 6-mujorin e parë të këtij viti, ka shtuar Rama, kemi një ulje të borxhit nën 69 për qind, në 68.2 për qind.
“Duke marrë parasysh edhe shlyerjen e detyrimeve ndaj kontraktorëve, niveli real i borxhit është 64 për qind”, ka thënë më tej Rama.
Ai ka shtuar se, paketat fiskale kanë ardhur me masa lehtësuese, të cilat kanë dhënë një efekt prej 97 milionë dollarësh në buxhetin e shtetit. Një tjetër arritje sipas kryeministrit kanë qenë edhe rimbursimet automatike të TVSH-së, që kanë eleminuar sipas tij zvarritjet.
