Kryeministri Edi Rama duke iu referuar takimit të një nate më parë. deklaron se kemi prezantuar 3 plane të rëndësishme zhvillimore në një dëgjesë publike, të organizuar nga Ministria e Zhvillimit Urban dhe Agjencia Kombëtare e Planifikimit të Territorit që përqas një filozofi të re planifikimi.
Kryeministri Rama poston në statusin e tij Facebook pjesë të takimit për planifikimin e përgjithshem kombëtarë, ku shprehet:“Mbrëmë gjatë prezantimit të 3 planeve të rëndësishme zhvillimore, në një dëgjesë publike, të organizuar nga Ministria e Zhvillimit Urban dhe Agjencia Kombëtare e Planifikimit të Territorit. Pas dy viteve punë intensive po marrin formë Plani i Përgjithshëm Kombëtar, Plani i Integruar Ndërsektorial i Bregdetit dhe Plani i Integruar Ndërsektorial i Zonës Ekonomike Tiranë-Durrës, në dialog me ekpertë vendas e të huaj, organizata të shoqërisë civile, akademikë e studentë, por edhe përfaqësues të sipërmarrjes e të komuniteteve”.
“Ndryshimi i parë cilësor midis këtij Plani të Përgjithshëm Kombëtar dhe gjithçkaje që është planifikuar në Shqipëri në këto 20 e kusur vite, është se ky është një Plan i Përgjithshëm Kombëtar me një filozofi të re, me një kulturë të re dhe bashkëkohore planifikimi, me një qasje dinamike në trajtimin e potencialeve të territorit. Duke e synuar planifikimin si një proces krijimi të sistemit të metabolizmit në një organizëm të gjallë, krijohet një mundësi e rëndësishme që ky plan i ri të mund të rimerret dhe të pasurohet në vijim nga të gjithë ata që do ta përdorin, qofshin institucionet qendrore, qofshin ato vendore, sipërmarrjet apo grupet specifike të interesit”, shkruan Rama.
