Vijon aksioni i policisë në bregdetin shqiptar për çlirimin e hapësirave publike nga zaptuesit.
Kryeministri Edi Rama bën të ditur se policia ka çliruar gjirin e Gjipesë nga zaptuesi i radhës, një nga xhevahiret më fantastike të Mesdheut.
“Kush e ka parë Gjirin e Gjipesë, një nga xhevahiret më fantastike të Mesdheut, e ka me siguri parasysh shtegun e dhive për të zbritur deri poshtë, nën shkëmbin gjigand të çarë si me thikë. Sot nëpër atë shteg u desh të zbriste policia, për ta çliruar gjirin nga zaptuesi i radhës, që u merrte lekë njerëzve pasi e kishte dhunuar atë bukuri të virgjër, me çadrat e me shezllonët e tij”, shprehet Rama.
Beteja e Policisë së Shtetit dhe inspektoriateve qendrore, qysh nga fillimkorriku në plazhe, po ndikon në përmirësimin situatës duke iu kthyer hapësirat publike pushuesve dhe duke mos toleruar asnjë zaptues të përfitojë nga këto hapësira. Por sipas kryeministrit kjo nuk mjafton.
Për ti dhënë fund kësaj situate, Kreu i Ekzekutivit ka bërë të ditur se në vjeshtë do të paraqesin në Kuvend ligjin e ri për mbrojtjen dhe administrimin e vijës bregdetare nga shteti.
/a.r
