Kryeministri Edi Rama ka dërguar një mesazh ngushëllimi familjes së shefit të FNSH-së në Shkodër Simon Gjeta, i cili u vra mbrëmjen e djeshme nga Ruzhdi Arishta. Në mesazhin e dërguar, Rama shpreh ngushëllimet e tij më të ndjera nënës, vëllezërve dhe motrës, të dëshmorit të Policisë së Shtetit Simon Gjeta, rënë mbrëmë në fushën e luftës me krimin.
Ai shprehet se vepra e njerëzve të mirë si Gjeta të cilët humbën jetën në krye të detyrës, do të lartësojë gjithnjë e më tepër detyrën dhe shpirtin e sakrificës së çdo anëtari të Policisë së Shtetit.
“Arritjet e mëdha të Policisë së Shtetit në fushën e kësaj lufte pa asnjë tolerancë të shtetit me krimin, janë vepër e shqiptarëve të mirë si Simon Gjeta, emri i të cilit deri dje i panjohur mes mijëra të tjerëve nën uniformën blu, sot i bashkohet atyre që dhanë jetën në krye të detyrës. Me bindjen e thellë se gjaku i dëshmorëve të Policisë së Shtetit do të plazmojë gjithnjë e më thellë ndjenjën e lartë të detyrës dhe shpirtin e sakrificës së çdo shqiptari e shqiptareje që është pjesë e trupës së rilindur të policisë, si edhe me angazhimin e palëkundshëm për t’i shkuar deri në fund përpjekjeve shtetndërtuese, në radhë të parë për sundimin e ligjit në Shqipëri, përulem me respektin më të thellë përpara veprës së dëshmorit Simon Gjeta.” shprehet në mesazhin e tij ngushëllues Edi Rama
