Kryeministri i Shqipërisë, Edi Rama, gjatë vizitës së tij në Bruksel, mbajti një deklaratë për mediat me përfaqësuesin e lartë të Bashkimit Evropian për politikë të Jashtme, Josep Borrell.
Ndër të tjera, Rama në fjalën e tij vlerësoi progresin e bërë nga vendi ynë në drejtimit të rrugëtimit të saj evropian, ndërsa garantoi Borrell se do të vijojë punën drejt realizimit të hapit të radhës.
Megjithatë, sipas Ramës, ata nuk mund të përqendrohen vetëm në atë se çfarë po ndodh brenda Shqipërisë, por edhe përreth saj, duke u fokusuar tek çështja e tensioneve mes Serbisë dhe Kosovës.
“Është shumë inkurajuese të dëgjosh fjalë të mira për atë se çfarë Shqipëria po bën në drejtim të reformave të marra. Ne po vijojmë punën tonë dhe jam i bindur se ne do të jemi në kohë për hapin e radhës.
Në të njëjtën kohë, ishte shumë mirë të ndanim mendimet tona këtu, për diçka për të cilën po punoni shumë fort që ka të bëjë me stabilitetin e gjithë rajonit, por gjithashtu edhe në drejtim të progresit të rajonit në përgjithësi.
Ne nuk mund të shohim vetëm brenda shtëpisë sonë, apo detyrave tona, pa u shqetësuar për atë se çfarë po ndodh përreth nesh, jo vetëm sa i përket asaj që po ndodh mes Serbisë dhe Kosovës, por edhe të të gjithë rajonit në përgjithësi.”
Kryeministri Edi Rama gjatë deklaratës së përbashkët me Borrell
Kreu i qeverisë u ndal gjithashtu edhe te lirimi i tre policëve të Kosovës, të cilët u morën peng nga forcat speciale serbe disa ditë më parë në kufirin me Serbinë.
Ai u shpreh i lumtur për lirimin e tyre, ndërsa deklaroi se duhet të punohet fort në drejtim të mos përsëritjes së situatave dhe ngjarjeve të tilla në rajon.
“Jam shumë i lumtur që tre policët e Kosovës u liruan, por ne duhet të vijojmë të punojmë fort me BE dhe gjithë partnerët tanë për të parandaluar situata të tilla. Kemi shumë punë përpara dhe me Procesin e Berlinit kemi bërë shumë progres.”
Kryeministri Edi Rama gjatë deklaratës së përbashkët me Borrell
/a.r
