Kryeministri Edi Rama në vizitën e tij në Ukrainë, përveç mbështetjes që i dha për marrjen e statusit të vendit kandidat loboi edhe për njohjen e pavarësisë së Kosovës.
Edhe gjatë konferencës me Presidentin Zelensky, por edhe gjatë takimit që zhvilloi me homologun Denys Shmyhal, Rama u shpreh se Ukraina duhet ta njohë pavarësinë e Kosovës.
Rama i kërkoi Ukrainës që të përçonte mesazhin e duhur në emër të komunitetit të ri politik që po rindërtojnë.
“Kosova është rreshtuar krah Ukrainës. Ukraina ende nuk e ka njohur Kosovën dhe e thashë edhe gjatë konferencës së shtypit, e thashë edhe publikisht që ju të rikonsideroni njohjen e Kosovës, pasi ata njerëz e meritojnë. Ata realisht dëshmuan diçka të jashtëzakonshme, sepse nuk mbeten peng i së shkuarës.
Ju të rikonsideroni njohjen e Kosovës pasi ata njerëz e meritojnë, ata realisht dëshmuan diçka të jashtëzakonshme sepse nuk mbetën peng i së shkuarës për të kujtuar sesi u soll Ukraina kur Kosova sulmohej.
Kjo do të ishte mirë, që Ukraina ta rikonsideronte dhe të përçonte mesazhin e duhur në emër të komunitetit të ri politik që duam të rindërtojmë”, tha Rama./m.j
