Në takimin elektoral të zhvilluar me banorë të Mallakastrës, Kryeministri Edi Rama deklaroi se “vetëm PS-së di të bëjë shtet”. “Besoj që nuk ka shqiptar të ndershëm dhe të arsyeshëm që mund ta mohojnë fakti se në 44 muaj ne kemi bërë mjaftueshëm për të provuar se ky vend mund të bëhet dhe se në këtë vend vetëm PS mund të bëjë shtet për të gjithë shqiptarët. Kemi hedhur vetëm themelet, shtëpia e shtetit tonë modern dhe europian kërkon ende një punë shumë të madhe dhe pjesa e dytë që kemi përpara është më e vështirë, sepse është pjesa që do të ndajë përfundimisht nëse Shqipëria më në fund do të bëjë një shtet që u shërben të gjithëve, apo do të kthehet mbrapa edhe njëherë tjetër, duke parë prishjen e këtyre themeleve të ndërtuara me mund e sakrificë”, tha Rama.
Kryeministri shprehu besimin se “në 25 qershor merret një vendim shumë më i rëndësishëm se sa vendimi se kush do të qeverisë në 4 vitet e ardhshme”. “Gara elektorale e 25 qershorit nuk është një garë mes partive të ndryshme, por është një garë për Shqipërinë që duam, me shtet, punë dhe mirëqenie. 25 qershori është një udhëkryq për të vendosur nëse flamurin kuqezi do ta ngremë më lart e do ta çojmë më shpejt në oborrin e Europës së bashkuar, apo nëse do të humbasim edhe shumë vite të tjera me flamujt e partive që votën e marrin për të shërbyer dhe e përdorin për interesa vetjake”, tha Rama.
Koalicioni ynë ka bërë shumë reforma dhe kjo është e pamohueshme, tha Rama, ndërsa kërkoi një votë që do t’i japë PS-së timonin e reformave. “Duhet të kemi timonin e reformave, pa qenë të detyruar të ulim të tjerë në prehër që nuk duan të marrin përgjegjësi, por duan thjesht të kenë një dorë në timon për të marrë gjithçka munden në funksion të vetvetes, jo të Shqipërisë. Mos lejoni partitë që janë mësuar që për një votë më shumë të kërkojnë një drejtori më shumë, që të kenë mundësi të shantazhojnë PS-në”, tha më tej Rama.
Kryeministri theksoi se “kemi një sfidë shumë të madhe përpara, të rrisim ekonominë mbi 5 për qind, që nga rritja ekonomike çdo familje të ndiej përfitimin e saj”. “Por për ta rritur ekonominë mbi 5 për qind na duhen dy portat pa të cilat nuk funksionon një shtet; porta e hapur e drejtësisë për çdo qytetar dhe porta e hapur për shërbimet e shtetit për qytetarin. Të parën kemi filluar ta hapim me vizion, kurajo dhe kokëfortësi. Në 4 vitet e ardhshme ajo portë do të jetë përfundimisht e hapur për të gjithë qytetarët”, siguroi Rama.
Kreu i qeverisë premtoi po ashtu edhe uljen e papunësisë nën 10 për qind, rritjen e rrogës minimale në 30 mijë lekë dhe rritjen çdo vit të pensioneve. Po ashtu Rama premtoi edhe rritjen me 40 për qind të rrogave në 4 vitet e ardhshme si dhe mbështetje për fermerët”.
