Rama në Kukës: Më mungon sot vëllai im Hashim Thaçi, ja pse aeroporti u quajt “Zayed”

Në aeroportin “Zayed – Flatrat e Veriut” në Kukës u ul aeroplani i parë me pasagjerë nga Londra.

Pas zbritjes së suksesshme në pistë, Kryeministri Edi Rama e konsideroi një moment historik hapjen e aeroportit të Kukësit dhe premtim të mbajtur.

Por, Kryeministri foli edhe për ish-Presidentin e Kosovës, Hashim Thaçin, të cilin e konsideroi “vëlla” dhe u shpreh se do të donte që sot të ishte bashkë me të.

Kujtojmë se Hashim Thaçi ndodhet në Hagë ku po gjykohet për krime lufte.

“Dua të ndaj me ju që më mungon shumë sot dikush që unë e konsideroj një prej shqiptarëve më të mëdhenj. Dhe jam i bindur që historia të tillë do ta konsiderojë. Më mungon shumë dikush që është një prej shqiptarëve më të mëdhenj jo se është vëllai im, por është vëllai im sepse është një prej shqiptarëve të mëdhenj, Hashim Thaçi. Prej këtu nuk e di a më ndjek por do dëshiroja t’i çoja një përqafim dhe t’i thoja se në muret e këtij aeroporti gjendet edhe një moment i historisë së shqiptarëve, kur Hashim Thaçi dhe Ibrahim Rrugova i hapën rrugë procesit të çlirimit përfundimtar të Kosovës”, tha Kryeministri Edi Rama.

Kryeministri tregoi edhe arsyen pse aeroporti i Kukësit mban emrin “Zayed”.

“Në këtë zonë u ngrit edhe kampi i madh i atyre që u shpërngulën nga shtëpitë me dhunë. Në atë kohë këtu erdhën shumë njerëz nga e gjithë bota. Midis tyre erdhi dhe dikush që sot është Princi i Kurorës së Emirateve të Bashkuara, Muhamed bin Zayed, i cili është i biri i një prej burrave më të urtë që me mençurinë e tij arriti t’i japë jetë atyre që sot e njohin si Emiratet e Bashkuara Arabe. I ati e nisi të birin që shoqërohej nga ai që sot është Kryeministri i Dubait dhe erdhën këtu për t’u kujdesur për refugjatët e luftës. Dhe plaku i urtë kishte dhënë urdhër që urgjentisht të hapej pista. Dhe gjurma e kësaj piste është gjurma e kësaj historie solidariteti për ata që kishin nevojë në atë moment për gjithë forcën e vëllazërisë. Princi i Kurorës e kujton edhe sot që kur ai ishte këtu i ati e merrte dy herë në ditë në telefon dhe i përsëriste “të gjithë ju që jeni aty bëni kujdes në shpërndarjen e ndihmave që asnjë familje mos t’i mungojë ushqimi”, u shpreh Kryeministri Edi Rama.

/a.r