Kryeministri Edi Rama ka njoftuar një lajm të rëndësishëm për qytetarët e Kavajës dhe rajonin përreth në lidhje me përmirësimin e shërbimeve shëndetësore. Në një postim në rrjetet sociale, ai theksoi se Qendra Spitalore Rajonale e Kavajës tani ofron shërbime më të avancuara për rreth 100,000 banorë, si dhe për turistët që vizitojnë plazhet e njohura të Golemit, Mali i Robit, Qerret dhe Spille.
Një ndër risitë më të rëndësishme të këtij spitali është hapja e Klinikës së Rehabilitimit për pacientët që vuajnë nga sëmundje kronike pulmonare, e cila ka për qëllim të ofrojë trajtim dhe mbështetje për ata që kanë nevojë për kujdes afatgjatë në lidhje me problemet e frymëmarrjes.
Kryeministri Rama theksoi se këto përmirësime janë një pjesë e angazhimit të qeverisë për të ofruar shërbime shëndetësore cilësore për të gjithë qytetarët, duke përfshirë gjithashtu ata që vizitojnë këtë zonë si turistë.
“Kavajë – Qendra Spitalore Rajonale që tani ofron shërbime shëndetësore për rreth 100,000 banorë të Kavajës, Rrogozhinës dhe zonave përreth, por edhe për turistët e shumtë që zgjedhin të pushojnë në plazhin e Golemit, Mali i Robit, Qerret dhe Spille.
Për herë të parë në këtë strukturë spitalore është hapur Klinika e Rehabilitimit për pacientët me sëmundje kronike pulmonare si dhe pas 6 vitesh, edhe shërbimi i Reanimacionit i pajisur me aparatura të reja duke mundësuar realizimin e operacioneve në kushte bashkëkohore”, shkruan Rama.
