“Me votën tuaj për aleancën tonë, aq më shumë do të punojmë që t’ua kthejmë besimin”. Kështu është shprehur kryeministri Rama sot në takimin e zhvilluar në Kamëz në përmbyllje të fushatës.
Rama tha se Kandidati I ASHE-së, Safet Gjici është drejtimi i duhur për Kamzën pas vitesh barbarizëm.
Të pranishëm në mbylljen e fushatës në Kamëz ishin deputetë të majtë si dhe kryetari i LSI, Ilir Meta.
Gjatë fjalës së tij, Kryeministri i vendit tha se 21 qershori është dita kur Kamza do t’i mbyllë njëherë e mirë dyert të shkuarës. “Edhe dy ditë ndajnë Kamzën dhe gjithë shqiptarët nga ecja në drejtimin e duhur. Votimi i 21 Qershorit është mjaft i rëndësishëm. Është një votim i përgjegjshëm, votim i arsyeshëm dhe votim për drejtimin e duhur. Sa më shumë, ju banorët e Kamzës dhe Paskuqanit, qytetarët e Bashkisë së Kamzës të votoni, të investoni votën në koalicionin tonë, aq më shumë do punojmë ne për t’ja u kthyer këtë besim”, tha Rama.
Ai shtoi se vota për kandidatin e ASHE-së, Safet Gjici, është votë për zhvillim dhe rilindje, teksa vota për kandidatin Mziu është një votë për t’u kthyer pas. “Më 23 Qershor shqiptarët refuzuan me përbuzje modelin e PD-së dhe Mziut, i cili duhet të ishte në burg me vendim gjykate. Shqiptarët larguan më përbuzje modelin e abuzimit me pushtetin dhe i çelën dyert rilindjes së vendit të tyre. Mjafton të shohësh Korçën, Beratin, Durrësin..etj për të diferencën mes modelit tonë dhe modelit të tyre. Tashmë ka ardhur momenti, që edhe Kamza të marrë drejtimin e duhur, drejtimin e Rilindjes, prandaj vota për Gjicin është votë për shtëpinë dhe për familjen tuaj, për zhvillimin e vendit tuaj”, tha Kreu i Ekzekutivit.
Sipas Ramës, ASHE ka marrë një vendim thelbësor për t’i dhënë mundësi zonjave dhe zonjushave të jenë 50% e kuvendit vendor. “Të gjitha zonjat dhe zonjushat duhet të votojnë. Duhet të marrin me vete edhe një mikeshë apo kushërirë të tyre, që e ka me dy mendje votimin, pasi më 21 Qershor, zonjat dhe zonjushat votojnë për vete, pasi ASHE ka vendosur që Këshillat vendorë të udhëhiqen 50% nga vajzat dhe gratë. Kjo, pasi ASHE vlerëson se gratë dhe vajzat janë kryefjalë e të ecurit në drejtimin e duhur”, tha Rama.
Ai gjithashtu kujtoi se Kamza sot është më e madhe dhe është një zonë me resurse të mëdha zhvillimi falë ndarjes së re administrative. “Falë reformës së ndërmarrë nga qeveria, fshatarët dhe qytetarët do të kenë të njëjtat të drejta. Falë reformës administrative, Shqipëria tashmë është më e bashkuar, nga 400 njësi të shpërndara pa produktivitet, sot Shqiptarët jetojnë në 61 njësi zhvillimi”, nënvizoi Rama dhe vota e 21 Qershorit për drejtimin e duhur është një votë që këto njësi zhvillimi të rrezatojnë energjinë e rilindjes dhe Shqipërisë që duam.
Kandidati i ASHE-së, Safet Gjici në fjalën e tij, siguroi se zgjedhja e tij në Bashkinë Kamëz do të thotë më shumë shërbime, më pak taksa vendore, më shumë ambiente shlodhëse dhe më shumë përkrahje për biznesin. “Do të rivitalizojmë tregun për sipërmarrësit, duke ulur taksta vendore. Do punësojmë 50 mijë persona përmes fuqizimit të tregut fason. Do të jemi pranë familjeve në nevojë përmes një fondi të veçantë dhe aboneve për urbane falas”, tha Gjici, i cili shtoi se Kamza ka shumë vite që drejtohet nga njerëz pa vizion dhe tashmë ka ardhur momenti që kjo të ndryshojë, pasi Kamza meriton të udhëtojë në drejtimin e duhur në krah të Aleancës për Shqipërinë Europiane.
