Kryeministri Edi Rama gjatë një prononcimi ku foli për qëllimin dhe rezultatet e kësaj vizite në Hong Kong, tha se Shqipëria paraqet një treg më të gjerë se territori i saj.
“Ne kemi dy vjet që po përpiqemi në mënyrë sistematike që të mbjellim farën e një ndryshimi të rëndësishëm në aspekt të investimeve të huaja direkte. Shenjat e para tanimë janë të qarta.
Por ndërkohë puna vazhdon dhe ne shumë shpresojmë që edhe nga kjo pjesë e botës të ketë një interesim për Shqipërinë, po jo thjesht për Shqipërinë, por me mesazhin se kush investon në Shqipëri investon në një treg shumë më të madh sesa Shqipëria, duke pasur parasysh zhvillimin e rëndësishëm politik dhe të bashkëpunimit në rajonin tonë.”
Shqipëria, theksoi Kryeministri Rama, ofron fusha shumë interesante për investimet, të cilat përbëjnë edhe sektorët prioritarë të mbështetjes ekonomike.
“Dihen sektorët ku ne jemi fokusuar për të stimuluar rritjen e mëtejshme dhe sektorët që faktikisht kanë edhe interesin më të madh përsa i përket investimeve, energjia, nafta dhe mineralet, turizmit, bujqësia, padyshim dhe manifaktura si një sektor me një rëndësi të posaçme në këtë fazë për Shqipërinë. Duke pasur parasysh edhe natyrën e rajonit dhe të investimeve të huaja në përgjithësi në rajonin tonë, besoj që ne kemi një fushë shumë interesante për të bërë investime.”
Kryeministri Rama tha se Shqipëria, një vend tërheqës për investimet është fokusi i përpjekjeve të qeverisë.
“Nuk është çështja sa jemi të gatshëm ne të përzgjedhim këtë apo atë vend, çështja është sa të gatshëm janë investitorët nga ky apo ai vend, për të synuar Shqipërinë dhe për të investuar në Shqipëri. Dhe kjo është përpjekja jonë.”
