Kryeministri Rama ka qenë i pranishëm paraditen e sotme në qytetin e Gjirokastrës, ku në takim me votuesit e rinj ai shoqërohej nga Bashkim Fino, Bledi Cuçi dhe Mirela Kumbaro.
“Bashkim Fino është sot me ne si një dëshmi e thjeshtë. Sa herë është puna për të prishur punë, është Saliu. Sa herë është puna për t’u zënë rrugë shqiptarëve kemi Saliun. Nuk e përmenda rastësisht Bashkimin pasi ai është dëshmitar i një historie tragjike për Shqipërinë, një histori që kurrë nuk duhet të përsëritet. Ajo e vitit 1997, kur Shqipëria rrezikoi ta humbte përgjithmonë të ardhmen. Ata që janë sot në çadër, janë protagonistët e asaj historie. Ata janë në çadër për një arsye shumë të qartë: Kanë një frikë të pangushëllueshme nga drejtësia” – tha Rama në Gjirokastër.
Sipas tij, Partia Socialiste është sot më shumë e vendosur se kurrë që të mos lejojë përsëritjen e historisë së 20 viteve më parë ku nuk kishte shtet dhe siguri.
“Nuk do lejojmë që t’i mbyllet rruga e drejtësisë për të cilën u desh fitorja e PS dhe e Aleancës për Shqipërinë Europiane që të bëhet kaq reale që pas një çerek shekulli më në fund shqiptarët të kenë një drejtësi ku të gjithë janë të barabartë” – u shpreh Rama.
Kreu i PS tha se me të njëjtën vendosmëri do të vijojë edhe lufta për rritjen ekonomike dhe shtimin e vendeve të punës.
“Ndryshimet kushtetuese i bëri një shumicë që ne nuk mund ta kemi, por bindja ime e thellë ishte që në vitin 2013 se nëse ka një mur që e mban të ndarë vendin nga e ardhmja dhe që duhet shembur është muri i padrejtësisë. Muri i ngritur nga gjykatës e prokurorë të korruptuar që janë të lidhur si mishi me thoin me ata që janë ngujuar në çadër” – tha Rama para të rinjve.
Sipas Ramës, nuk ka asnjë shqiptar që nuk e ndjen nevojën për ta shembur murin e padrejtësisë. Kryeministri tha drejtësia prej 25 vitesh është një mall që mund të blihet dhe shitet ndërsa gjykatat janë një pazar i gjësë së gjallë.
“Nuk tërhiqemi jo vetëm përpara ndonjë çadre, por as para ndonjë kërcënimi apo shantazhi. Sepse në këtë luftë ne përfaqësojmë Shqipërinë që duam për të gjithë” – tha Rama.
/javanews/b.d
