Kryeministri Edi Rama ishte sot në Durrës ku zhvilloi një takim me operatorët turistikë. Edhe në këtë aktivitet ai u ndal te agroturizmi duke theksuar se vendi ka potenciale të mëdha. Rama tha se zonat rurale të Durrësit mund të kthehen në destinacion për këtë lloj turizmi që përkthehet në të ardhura për qytetarët.
“Unë besoj që ne të vazhdojmë, dhe jam i bindur që do të shtohet në atë listën e arsyeve që ju promovoni për të sjellë turistët në Shqipëri, të vazhdojmë me agroturizmin. Zona ka potenciale në pjesën rurale. Ka mundësi tu japim një shans atyre që nuk kanë shtëpinë buzë detit, nuk kanë mundësira dhe akses për tregun bujqësor për shkak të pozicioneve gjeografike, por kanë në dispozicion një bukuri të jashtëzakonshme të kësaj zone, kanë edhe një traditë të bukur që mud ta kthejnë në traditë mikpritjeje të bazuar te suksesi dhe fitimi”, deklaroi Rama.
Ai u ndal edhe te investimet e kryera në bregdet. Sipas shefit të qeverisë, në bregdetin e Durrësit nuk derdhen më ujra të zeza.
“Sot jo vetëm që nuk derdhen më ujrat e zeza në det përgjatë bregdetit të Durrësit, por po bëhet investimi i shumëpritur për ujin, për ujësjellësin. Është një investim i madh që vijon, e ka filluar të japë në fakt rezultate në furnizimin me ujë të gjithë zonës që ka qenë me etje historikisht”, vijoi Rama./a.m.
