Këtë të martë, më 26 maj, u zhvillua në Bruksel Konferenca e 8-të Ndërqeveritare, mes Shqipërisë dhe Bashkimit Europian, e cila hap zyrtarisht rrugën për kalimin e vendit tonë në fazën përmbyllëse të negociatave për anëtarësim në BE.
“Pse qeshni, jeni të rinj. Nuk e njihni ende vlerën e dashurisë. Duhet të mësoni nga dashuria e Shqipërisë për Bashkimin Europian”, tha kryeministri Edi Rama në nisje të fjalës së tij.
Kjo pasi ai e nisi konferencën me batuta. Ai iu drejtua Raouna, në greqisht “agapi mou“, kurse Komisioneres së Zgjerimit, Marta Kos në një variant “jo saktësisht slloven” siç u shpreh ai “Yubim te”. Kos e puthi atë.
Ai vazhdoi: “Dashuri që sjell vuajtje ndonjëherë, por ja ku jemi. Duhet të jemi të lumtur sepse kemi arritur një tjetër gur kilometrik. Ashtu siç e ka theksuar Marta, ne i çelëm të gjithë grupkapitujt brenda 11 muajsh dhe kaluam nga kjo tek faza e nisjes së mbylljes së kapitujve me këtë konferencë të sotme, edhe njëherë brenda një afati shumë të shkurtër. Kështu që ndihemi të energjizuar. Në fund, është vetëm fillimi i fundit dhe e dimë që duhet të bëjmë shumë më tepër punë.”
“Dua të falënderoj po ashtu Silvion, zëdhënësin tonë të dashur në emër të kujdestarit, që duhet të na sjellë lajme të mira dhe të këqija. Po e bëj këtë falënderim sepse kjo është konferenca e fundit ndërqeveritare ku ai përfaqëson BE-në dhe dua të falënderoj dritën e diellit që solli Qipro dhe, më së fundmi, ky qytet që gdhihej i mërzitshëm shndriti njëherë.”, tha më tej Rama.
Ai shtoi: “Do jemi anëtarë të kësaj familjeje brenda kësaj dekade. Unë e di, e ndjej.”
