Kryeministri Edi Rama ka ndarë këtë të mërkurë pamje nga kantieri i Muzeut Historik Kombëtar, duke e cilësuar si një nga projektet më të rëndësishme të turizmit kulturor në vend.
“Mirëmëngjes dhe me këto pamje nga kantieri i rilindjes së Muzeut Historik Kombëtar, një thesar i rëndësishëm i turizmit kulturor, ju uroj një ditë të mbarë”, – shkruan Rama në postimin e tij në rrjetet sociale.
Muzeu Historik Kombëtar, institucioni më i rëndësishëm në rang kombëtar, mbylli dyert për publikun më 15 mars 2024.
Sipas njoftimeve zyrtare, ai do të qëndrojë i mbyllur për katër vite, me rihapjen e planifikuar më 15 mars 2028.
Projekti parashikon restaurimin, rikonstruksionin dhe muzealizimin e objektit, i shpallur Monument Kulture i kategorisë së Dytë.
Ndërhyrjet në Muzeun Historik janë pjesë e programit EU4Culture, që mbështet 24 objekte të trashëgimisë kulturore në Shqipëri, me një fond prej 40 milionë eurosh të siguruar nga Bashkimi Europian dhe buxheti i shtetit.
Investimi pritet të sjellë një ndryshim rrënjësor në mënyrën se si publiku do të lidhet me historinë dhe elementët e identitetit kombëtar.
Vetëm gjatë vitit 2023, Muzeu Historik Kombëtar u vizitua nga 99,796 persona – një rritje prej 80% krahasuar me vitin 2022, kur numri i vizitorëve ishte 55,306.
Me këtë projekt, Rama e ka cilësuar kantierin si “rilindjen e muzeut”, duke e vendosur në qendër të vizionit për zhvillimin e turizmit kulturor në Shqipëri.
