Krerët e koalicionit qeveritar kanë zhvilluar një takim pak orë para seancës parlamentare të jashtëzakonshme e thirrur posaçërisht për ngritjen e komisioneve të Vettingut.
Teksa opozita ka paralajmëruar se nuk do të kthehet në parlament, kryeminisitri Rama dhe kryeparlamentari Meta u takuan për të diskutuar në lidhje me hapat që do të ndiqen nga mazhoranca.
Në takim ishin të pranishëm edhe Ministri i Drejtësisë Petrit Vasili, Kryetari i Komisionit të Reformës në Drejtësi Fatmir Xhafaj si dhe kreu i grupit të PS Gramoz Ruçi.
Seanca parashikohet të nisë në orën 18:00 ndërsa në orën 17:00 pritet që të mblidhet Konferenca e Kryetarëve.
Më herët gjatë ditës, kreu i kuvendit Ilir Meta i dërgoi një letër të gjithë krerëve të grupeve parlamentare për të sinjalizuar afatin përfundimtar të përzgjedhjes së deputetëve që do të jenë pjesë e komisionit ad hoc për vettingun. Komisioni në fjalë përbëhet nga 6 anëtarë, 3 nga pozita dhe tre nga opozita./java/a.k
