Kanë konkuruar njëri-tjetrin në distancë, ashtu siç garojnë mes tyre çdi ditë në politikë. Fjala është për dy aleatët miq-armiq, Edi Rama dhe Ilir Meta. Që të dy i kanë qëndruar besnikë formateve të komunikimit që preferojnë: kryeministri, në një intervistë humoristike me Ermal Mamaqin tejet të reklamuar gjatë javës dhe shumë të ndjekur, kurse kreu i Kuvendit, me stilin e tij të qetë në studion e Arian Çanit.
Kanë qenë dy intervista që kanë pasur një qëllim të vetëm, pavarësisht mjeteve shprehëse të ndryshme që kanë përdorur. Rama ka mbrojtur me batuta dhe shaka punën e qeverisë së tij, kurse Meta ka shpjeguar me tone serioze momentet më delikate që po kalon ai, LSI dhe koalicioni. Ka qenë një garë interesante në distancë, mes dy personash që sot mbajnë në dorë pushtetin, por edhe frenat e zhvillimit të ngjarjeve në vend. E ndërsa ata merreshin me përgjigjet e pyetjeve në studiot respektive, diku në Gjirokastër prokuroria arrestonte një ish-ministër…
