Kryeministri Edi Rama tha se figura e mësuesit duhet të jetë i vetmi pushtet mbi shkollën. Në një darkë të shtruar për nder të 1 mijë mësuesve më të spikatur të vitit, Kryeministri theksoi se mësuesit duhet të jenë të paprekshëm nga politika.
“Në fakt i vetmi pushtet mbi shkollën është pushteti i mësuesit dhe për mua prsonalisht përtej domosdoshmërisë për të luftuar korrupsionin, k rëndësi edhe më të madhe fakti që, duke bërë këtë, ne rrisim autoritetin e figurës së mësuesit. Një figurë që duhet të luftojmë të gjithë së bashku për ta bërë të paprekshme. Cdo autoritet publik duhet të qëndrojë me respekt para tyre. Ashtu sic dhe ndodh tek vendet të cilave ne duam ti ngjajmë, ku nuk ka politikë që guxon të prekë mësuesit.”- u shpreh Rama
Për këtë qëllim, Kryeministri shtoi se projekti i Ministrisë së Arsimit dhe qeverisë për të krijuar Kartën e Mësuesit, është pikërisht në funksion të krijimit të kushteteve për të bërë mësuesin të paprekshëm ditën kur qeveritë do të ndërrohen.
“Për këtë arsye jemi investuar që ti kualifikojmë mësuesit, duke arritur që cdokush të ketë kartën e tij, kreditet e tij dhe këto, sot, nesër, pasnesër, pasi të ikë e të vijë një qeveri, të mbeten aty si paratë në bankë, ku askush të mos guxojë të mohojë sesa ke e sesa pikë nuk ke.” -tha Kryeministri.
Rama shtoi se akuzat që i janë bërë reformës në arsim, më së shumti i janë drejtuar mesazherit dhe jo vetë reformës apo përmbajtjes së saj.
“Ajo që ne po humbasim, dhe që unë besoj se duhet ndarë me ju, pasi ju keni një përgjegjësi më të madhe, që ka të bëjë me edukimin e fëmijëve dhe qytetarëve, është fakti se në vend të kundërshtisë së shëndetshme, ne jemi të gjithë të kërcënuar nga histeria kundërshtuese që zëvendëson objektin e diskutimit me përplasjet mes individëve. Që zëvendëson dialektikën e ballafaqimit me nevojën për të asgjësuar, jo mesazhin por mesazherin, jo atë që thuhet por personin që e thotë.” -tha Rama.
Rama tha se ka ende drejtues shkollash që nuk e meritojnë të jenë aty ku janë, por, sipas Kryeministrit e rëndësishme është se një grup mësuesish kompakt, ka fuqinë që të bëjë presion drejt këtyre personave.
“Kanë prodhuar jo pak por 177 mijë nxënës, me dije të deformuara dhe efekti zinxhir i korrupsionit që i solli në sistem ka lënë jashtë mësues të mirë e kualifikuar. Mijëra e mijëra të tjerë u prekën seriozisht nga universitetet private jashtë cdo standarta ligjor e cilësor. Nuk ka receta të përsosura e as ilace magjike por vetëm reforma e masa të cilat mund të hanë diskutim cdo ditë, cdo orë, por që pa asnjë më të voglin dyshim janë të nevojshme. Është e sigurtë se një nga betejat më të rëndësishmë dhe armiku më i rrezikshëm që ne kemi në këtë proces është tulatja e cdo shqise për të bërë një debat të shëndetshëm dhe largimi nga një parim themelor, respektimi i mendimit të tjetrit. Nëse kjo sëmundje trashëgohet do të ishte fatale për zhvillimin e qëndrueshëm të këtij vendi.
Ka ende sot drejtues shkollash që nuk e meritojnë të jenë aty ku janë, ashtu sic ka edhe drejtorë institucionesh që nuk e meritojnë të jenë aty ku janë. Por mendoj se arsimin nuk e përcaktojnë këta, por kompaktësia e mësuesve, pasi bashkësia e mësuesve nuk mund të preket nga këta të parët.”- theksoi Rama.
