“Partia Demokratike është një pasuri kombëtare që sot ka rënë në duar të gabuara, por do vijë një ditë që do ë zgjohet nga gjendje e epilepsisë që e ka zënë më 23 qershor të 2013”. Kështu deklaroi kryeministri Edi Rama gjatë një takimi elektoral në Lezhë.
“Më vjen për të qarë me PD, që shikoj që është bërë një forcë që do ishte udhëhequr shumë më me dinjitet nga Sudja, se sa sot nga dikush që akoma nuk e ka kuptuar se çfarë votojnë shqiptarët më 21 qershor”, theksoi më tej Rama.
Shefi i qeverisë vlerësoi Viktor Tushen si njërin prej menaxherëve më të shkëlqyer të Shqipërisë. Rama foli dhe për vështirësitë nëpër të cilat kalojnë çdo ditë shumë familje shqiptare.
“Ka shumë familje që nuk kanë asnjë në punë, ka familje që vuajnë çatinë e varfërisë brenda shtëpisë së tyre dhe që ngrihen në mëngjes me ankthin se çfarë do të bëjnë? Si do t’ja dalin për ushqimin e fëmijëve. Ka shumë njerëz që trokasin në dyert e shtetit dhe nuk e marrin shërbimin që meritojnë. Ndeshen edhe sot me surretër të korrupsionit, me të cilin ne kemi shpallur një luftë pakompromis, por larg të qënit e fituar. Nuk kam ardhur për të predikuar se sa me fat jeni ju që na keni ne. Kam ardhur me besimin e plotë se fakti që unë dhe të gjithë ne që jemi të vetëdijshëm për vuajtjet, për sakrificat, për problemet e panumërta, na bën shumë herë më të përgjegjshëm për domosdoshmërinë që t’i zgjidhim këto probleme. Kam ardhur me besimin e plotë se çdo banor nuk ka pritur që në 18 muaj bilancin tonë të zgjidhnim të gjithë ato probleme, dhe të kuronim të gjithë ato plagë që u hapën në vite të tëra, por ka mundur të shohë provën e pakundërshtueshme se më 23 qershor u investua në drejtimine duhur. Në 18 muaj treguam se jemi fuqia që mund të bëjë, po bën dhe do ta bëjë shtetin që meritojnë shqiptarët”, tha Rama.
