Kryeministri Edi Rama ka marrë pjesë sot në një tryezë me sipërmarrësit italianë, nga ku përsëriti thirrjen për investitorët që të vijnë dhe të investojnë në vendin tonë pasi Shqipëria ofron një klimë shumë të mirë për biznesin. Në fjalën e tij kryeministri Rama tha se qeveria është e gatshme t’i hapë rrugë kujtdo që do të investojë.
Në Konferencën “Italia dhe Shqipëria të ndërtojmë së bashku”, Rama vuri në dukje afërsinë mes dy vendeve jo vetëm nga pikëpamja historike.
“Ky vend nuk është vetëm një ëndërr e parealizueshme për ju, është një realitet. Duhet shumë më pak kohë për të ardhur në Shqipëri, se nga veriu i Italisë në jug. Të vish në Shqipëri, ku mikpritja është shumë e ngrohtë dhe qeveria është e gatshme ti hapë rrugë kujtdo që do të investojë. Jemi dy vende shumë të afërta, jo vetëm nga pikëpamja historike”, tha ai.
Duke qenë edhe një tifoz futbolli i ekipit italian të Juventusit, Rama solli një shembull nga bota e futbollit dhe lidhjes mes dy vendeve.
“Ishim shumë të lumtur për ju edhe kur mundët Realin e Madridit. Ne kemi një Italian me dy pasaporta që stërvit Kombëtaren tonë. Vetëm një Italian do të donte shtetësinë shqiptare dhe vetëm një italiani do t’ia jepnim. Se imagjinoj që një gjerman të dojë kombësinë shqiptare”, tha kryeministri.
