Rama, më lehtë flet për Kosovën në OKB, sesa ulet me Kurtin

Nga Ben Andoni

Kryeministri Rama, jo pak herë, është kritikuar në Kosovë, por pas “Ballkan Open”, ai ka qenë pjesë e një histerie të gjerë. Më shumë akoma, kjo frymë ndihet kur Rama është përballur në takimin e fundit ndërqeveritar me Kurtin, anuluar dhe pastaj me marrëveshjet e firmosura me postë!! Ashtu si ndodh, një pjesë e shoqërisë matanë kufirit, e lidhur shumë me narrativën e Vetëvendosjes dhe që nuk fal asnjë devijim, që nuk i shkon për shtat Kurtit e kanë pasur shpesh “kokën” e Ramën si objektivin e një tabele qitje, mbushur me mallkime dhe sharje. Së fundmi, për t’ua kthyer, Rama ka përdorur në rrjetet sociale pjesën e fjalimit që mbajti pak orë më parë në OKB. Me një krenari të tepruar në profilin e tij në ‘facebook’ ka shkruar se: “Ja si flet një tradhtar i vërtetë i Kosovës, i cili me këtë rast iu dërgon të fala vëllazërore krejt atyre që prej Kosove, e shajnë me nanë e me babë si ‘vëllaun e Vuqiqit’”.

Nëse vendet tona do të ishin normale në marrëdhëniet e tyre do të duhet të ishin më të kursyera në artikulimet e tyre, kur flitet në hapësira të tilla. Është fakt se në sesionin e këtij viti në OKB, Shqipëria, përmes gojës së Ramës, ka thënë se: Kosova është pjesë e pandashme e realitetit ndërkombëtar dhe se krahasimet me Ukrainën nuk qëndrojnë…Dhe, se Kosova nuk duhet të mbahet peng nga askush me pretendime të rreme e se kjo duhet të fillojë nga pesë shtetet anëtare mosnjohëse. Më qartë e pastër nuk ka.

Ramës i atribuohet edhe fakti që në vizitën e tij të parë zyrtare në Beograd, e tregoi hapur dhe qartë realitetin e Kosovës, si të pavarur, duke e deklamuar me të gjithë seriozitetin dhe peshën e duhur. Janë këto deklarata, ashtu si Rama i ka shfrytëzuar në të gjitha takimet e tij, për të shprehur jo thjesht mbështetjen për Kosovën, por më shumë se çdo gjë: tregimin për një realitet të pakthyeshëm të bashkëkombasve tanë. Ky fakt, jemi të sigurt, se do ta artikulonte cilido nga zyrtarët tanë po të ishte në Beograd dhe në tribuna ndërkombëtare.  Dhe, vërtetë, paçka fjalëve apo disa herë protokolleve ”të ftohta”, Rama është pritur me nderime, sidomos nga njerëzit, ashtu si çdo zyrtarë tjetër.

Veçse është absurde tani, që prej muajsh, që marrëdhënia e dy vendeve tona mbahet peng i një marrëdhënie të nderë të egove të Ramës dhe Kurtit. Ajo kulmoi zyrtarisht me mosmbajtjen normale të mbledhjes së fundit të përbashkët dhe mungesën e një normaliteti, që po bie gjithnjë e në sy. Paçka se shkëmbimet e zyrtarëve të niveleve të tjera nuk mungojnë dhe lidhja mbetet e fortë mes njerëzve, gjithnjë e më shumë janë shtuar ata, që duan ta ngatërrojnë. Kjo nis qysh nga projeksioni i turizmit dhe “braktisja” e kosovarëve, që shpallet nga disa individë, deri në ftohtësinë bezdisëse të marrëdhënieve më të larta. Është më e lehtë për Ramën që të artikulojë në OKB dhe kudo për Kosovën sesa të ulet e të flasin normalisht me Kurtin. Ashtu, si ky i fundit, mund të shkoj në çdo panel dhe forum të rastit, por mos të gjendet në Tiranë, kur duhet!!! Mbase këto rreshtat do ishin të tepërta në kushte të tjera, por gjërat që kemi mes vete, duket se nuk është se i kemi bajagi aq mirë. (Javanews)