Kryeministri Edi Rama ka dalë mbrëmjen e së martës në një konferencë të përbashkët për shtyp me homologun e tij kroat Andrej Plenkovic.
“Në takimin që patëm pak më parë ramë dakord se raportet mes 2 shteteve janë të shkëlqyera dhe ne jemi aleatë në NATO, por shpresojmë se marrëdhëniet mes Shqipërisë dhe Kroacisë do të mbeten gjithnjë pozitive. Republika e Shqipërisë do të ketë edhe më tutje përkrahjen e Kroacisë në rrugën e saj drejt BE, sidomos pas reformave që janë bërë në Shqipëri, por edhe dinamika e hapave që janë ndërmarrë për anëtarësimin e Shqipërisë në BE. Në këtë rrugë drejt BE jemi të gatshëm që ekspertët tonë kroatë të ndihmojnë palën shqiptare” – u shpreh Kryeministri kroat.
I pritur nga ky i fundit në Samitin e Kryeministrave të iniciativës të Europës qendrore në Zagreb, Rama solli në vëmendje shembujt e bashkëpunimit si dhe emrat e njohur që i lidhin dy vendet.
“Ne vejmë theksin te nevoja e shkëmbimeve tregtare dhe vitin e ardhshëm do të organizojmë një forum kroato-shqiptar me biznesin. Gjithashtu firmosëm një deklaratë për forcimin e sigurisë në kufijtë respektivë. Unë i propozova kryeministrit të Kroacisë që të organizojmë një tjetër format me Shqipërinë, Kosovën dhe Maqedoninë” – tha Rama.
Më herët, të dy kryeministrat nënshkruan një marrëveshjeve të përbashkët për Partneritetin Strategjik.
/A.Rada
