Kryeministri Edi Rama do të zhvillojë këtë të premte një takim me ministrat dhe drejtuesit politikë të Partisë Socialiste në qarqe. Takimi pritet të mbahet në orën 17:30 në selinë e PS-së dhe vjen pas mbledhjeve dyditore të zhvilluara në Pogradec dhe mbledhjes së qeverisë një ditë më parë.
Në fokus të diskutimeve pritet të jenë bashkëqeverisja dhe organizimi i strukturave socialiste në territor. Rama pritet t’u japë drejtuesve politikë udhëzimet për nisjen e takimeve në zonat e tyre elektorale, me synim prezantimin dhe shpjegimin e dokumenteve strategjike të mazhorancës, përfshirë “Besën” dhe “Praninë Besnike”.
Një tjetër çështje e diskutuar pritet të jetë platforma “Pasqyrë Albania”, e prezantuar gjatë qëndrimit në Pogradec. Platforma synon të mbledhë dhe të ndjekë ankesat e qytetarëve, me objektivin që problematikat të marrin përgjigje brenda dy javësh dhe qytetarët të kenë mundësi të ndjekin në kohë reale ecurinë e kërkesave të tyre.
Sistemi parashikohet të funksionojë përmes dy mekanizmave. “Flamingo Albania” do të shërbejë për mbledhjen e ankesave dhe shqetësimeve të qytetarëve, ndërsa “Radar” do të gjurmojë mënyrën se si kërkesat trajtohen nga ministritë, bashkitë dhe institucionet e tjera.
Krahas organizimit të brendshëm dhe punës për bashkëqeverisjen, Partia Socialiste ka nisur përgatitjet në funksion të zgjedhjeve lokale të vitit 2027. Në axhendën politike të socialistëve është edhe Asambleja e Partisë Socialiste, e cila pritet të zhvillohet në javën e parë të shtatorit.
