Kryeministri Edi Rama ka mbledhur Asamblenë e Partisë Socialiste të Tiranës. Ai tha se disa familje në zonën e Kombinatit do të marrin shtëpi të reja falas, nga programi i rindërtimit.
“Ka shumë gjerë që ne kemi bërë. Isha në Kombinat, patjetër që aty ka qartësisht ka probleme, por aty po krijohen kushte të paimagjinueshme për një shtresë shoqërore familjesh, që përndryshe kurrën e kurrës nuk do kishin dot shtëpitë që po marrin dhe do marrin me rindërtimin dhe po i marrin falas”, tha ai.
Më tej Rama, u ndal tek përjashtimi i biznesit të vogël nga pagesa e taksave.
“Kemi dyfishuar subjektet private në Shqipëri në këtë periudhë. Ne kemi patur një sistem, ku kemi marrë detyrën ku për çdo pagë kishte një taksë 10%. Pastruesja e kryeministrisë paguante 10% nga taksa e vetë, taksë, pa llogaritur sigurimet, sot 57% e pagave nuk kanë asnjë taksë, 36 % e kanë nga 4-10 %. Ne kemi hequr dorë, kemi hequr nga arka e shtetit 140 mln euro në vit që merreshin nga paga atyre që paguheshin më pak. Ne nuk i kemi marrë në dhjetë vjet. Tek biznesi i vogël. Ne kemi të vetmin biznes të vogël si kategori pa taksa, nuk e ka asnjë vend në Ballkan, lërë pastaj Evropën, sepse aty taksat janë të këpusin në mes. Deri në 140 mijë euro xhiro janë pa taksë”, tha ai.
