“Në një vit kemi çuar përpara procesin e legalizimeve. Ne duam t’i japim fund zvarritjeve në këtë proces. Me këtë takim ne kalojmë në 7 mijë legalizime vetëm në Bashkinë e re të Durrësit. Sigurisht që ka ende shumë për të bërë
Kështu u shpreh Kryeministri Rama sot nga Rrashbulli i Durrësit ku shpërndau 1200 leje legalizime.
Kryeministri theksoi se në 8 vjet PD shpërndau 59 leje legalizimi, ndërsa sot pas 18 muajsh janë 1200 dhe falas.
“Nëse shohim se ç’duhet bërë, jemi ende larg destinacionit, por nëse krahasojmë me ç’ishte bërë në 8 vite, është e dukshme se sa është bërë në 18 muaj”. “Dhe kjo tregon se jemi në drejtimin e duhur”, tha Rama.
Kryeministri premtoi dhe vijimin e investimeve në këtë zonë duke e bërë njëlloj të banueshëm e me standarte si Durrësin dhe duke e quajtur Durrës i ri.
“Ne do të vazhdojmë të bëjmë investime te ai që ne e quajmë Durrësi i ri, ndërsa ata të PD-së e quajnë këneta. Ne duam të transformojmë jetën e qendrave të banuara. Vangjush Dako është një shembull, një model, një arsye për të besuar se është fjala te një vizion dhe te një projekt. Do të bëjmë investime në të gjithë Bashkinë e re të Durrësit.
Këto janë zgjedhjet e 21 qershorit. Ne kemi programin dhe planet për këto zgjedhje. Ata nuk flasin për këto projekte, se nuk dinë t’i bëjnë. Nuk dinë të japin shembuj”, tha Kryeministri Rama.
