Një ditë pas protestës së dhunshme në “Rrugën e Kombit” ku iu vu flaka sporteve të firmës koncesionare e cila do mbledhë taksën për automjetet që do kalojnë aty, kryeministri Edi Rama sqaroi se 2 muajt e lënë si afat do shërbejnë si periudhë fushate për të informuar banorët. Kreu i qeverisë tha se banorët e zonave të Kukësit janë disinformuar.
“Disinformimi dhe manipulimi i njerëzve në Kukës ka triumfuar mbi shpjegimet që ne kemi dhënë mbi debatet ditët e fundit. Të tërhiqesh nuk është asnjëherë e paudhë nëse duhet të tërhiqesh. Këtu s’ka tërheqje por të luftuar disinformimin. Më vjen shumë keq që në këtë proces pasi kjo kontratë është nënshkruar prej 2 vitesh. Pasi ka një vit që kompania ka filluar punën dhe ka bërë goxha punë deri tani, ngrihet një furtunë në gotë dhe derdhet benzinë e ndizet zjarr mbi pronën e përbashkët dhe mbi një investim që sa për dijeni do duhet ta dëmshpërblejë përsërsi buxheti i përbashkët. Në këtë fushatë disinformimi që me dashje apo pa dashje ju keni rolin tuaj mund të kishim bërë më shumë për ta luftuar. Do bëjmë atë që duhet për të informuar siç duhet publikun dhe në mënyrë të posaçme banorët”.
Sipas tij, u ngrit nje ‘furtunë në gotë’ dhe mbeten benzina e zjarri.
“Sërish taksdapaguesit do të duhet të dëmshpërblejnë kompaninë për dëmet. Nëse cohet një grup vandalësh dhe i vë zjarrin është detyrim i shtetit të mbrojë investimet publike dhe private. Policia bëri më të mirën e mundshme duke ruajtur gjakftohtësinë në ato rrethana që ui krijuan, kur një grup vandalësh sulmuan egërsisht. Nxitësit janë në sytë e të gjithëve dhe këtë e di i madh dhe i vogël”, u shpreh Rama.
Kreu i qeverisë tha se kompania koncesionare ka investuar 15 milionë euro përgjatë autostradës, ndërsa gjatë dimrit tha se nuk ka pasur bllokim të rrugës për shkak të reshjeve të dëborës falë borëpastrueseve të firmës të cilat kanë qenë në punë gjatë gjithë kohës.
“Nevojitet ndërtimi i urës së re të Kukësit e cila nuk ekziston. Shtatë mbikalime të reja në pikat ku është e nevojshme për banorët, komunitetet përgjatë rrugës të cilat nuk ekzistojnë. Vetëm projekti me studimin gjeologjik, sepse ishte rrugë pa studim gjeologjik i cili ka kushtuar 2.8 mln euro. Të gjitha këto janë masa financiare të rënda dhe të domosdoshme për të garantuar vazhdimësinë normale të funksionimit të rrugës. Nëse ne nuk do të veprojmë kështu dhe nuk do të vendosnim pagesën për përdoruesit e rrugës, do të ishim më të qetë, por do të nxisnim rrënimin e mëtejshëm të rrugës dhe ajo do dilte jashtë kushteve të sigurisë, do bëhej e papërdorshme dhe do duhej një ndërhyrje masive. Ai (Berisha) ka thënë se e ndërtuam rrugën, por nuk e mirëmbajmë dot dhe ka thënë të vërtetën si rrallë herë”, tha Rama.
