Një ditë pas apelit të bërë nga Ministri i Zhvillimit të Ekonomisë Arben Ahmetaj për operacionin kundër informalitetit të bizneseve, edhe Kryeministri Edi Rama ka theksuar vendosmërinë e qeverisë që ai drejton për t’i shkuar deri në fund që në shtator betejës së re.
Në një dalje për mediat, kryeministri Rama nënvizoi se kësaj sëmundje që për mbi 20 vite i ka rënduar xhepat e qeverisë dhe të shqiptarëve, tashmë i ka ardhur koha që të përballet me ligjin.
Në këtë kuadër, Rama theksoi se aksioni që do të nisë në shtator, do të ketë si fillim në qendër të tij biznseset e mëdha dhe më pas ato të voglat.
“Vazhdojmë të ju bëjmë apel të gjithë bizneseve që bëjnë aktivitet të paregjistruar që të vrapojnë të regjistrohen përpara se të nisë operacioni rrënjësor i kësaj sëmundje të patolerueshme. Përpara se operacioni t’i vendosë përpara ligjit. Ne ju dhamë kohë edhe bizenseve dhe lokaleve që të hyjnë në binaret e ligjit. Kjo sëmundje ka 20 e kusur vite. Puna e Doganave dhe Tatimeve ka hedhur një bazë mbi të cilën ne mund të vazhdojmë me këmbë në tokë një operacion që do të kishte dështuar. Kjo sëmundje nuk është e re, por koha po skadon, prandaj këtë apel do ta përsërisim më shpesh deri në fillimin e operacionit, që njësoj si ai i energjisë, për të shkulur ccdo lidhje të paligjshme, projektin e transformimit të sektorit. E po njësoj edhe ky operacion nuk do të ndalet për asnjë arsye. Ky operacion nuk ka në fokusin e vetë më të vegjlit por më të mëdhenjtë. Prandaj edhe përgatitja e operacionit ka nisur nga më të mëdhenjtë. Nafta, cigarja do të jenë në qendër të përpjekjes sonë frontale. Por padyshim zinxhiri i informalitetit ka një fillim dhe një fund. Dhe ne nuk do të lëmë pa kontrolluar asnjë hallkë, nga më të mëdhenjtë tek më të vegjlit.” theksoi Rama
Kryeministri përsëriti apelin e tij për të gjitha bizneset që të futen në binaret e ligjit, pasi me nisjen e operacionit të gjithë shkelësit do të duhet të përballen me ligjin. Duke e krahasur këtë operacion të ngjashëm me atë të energjisë, Rama tha se ai nuk do të ndalet deri sa kësaj sëmundje t’i jepet fund.
Ndërsa lidhur me faktin se përse ky operacion nuk ka nisur më parë, Rama tha se gjatë kësaj kohe u përgatit terreni për atë që ai e quajti një operacion madhor.
“Edhe diçka të fundit, kujtdo që pyet se pse nuk nisi më parë, është shumë e thjeshtë, ata që nuk e bënë në 20 e ca vite, na e bënë të pamundur të merremi më parë me këtë operacion madhor që kërkon një terren të përgatitur. Sot terreni është i përgatitur, dhe fara e sjelljes në bazë të ligjit, tani më është mbjellë. Ne duhet vetëm ta kultivojmë sepse jemi larg një vendi ku ligji është i barabartë. Por edhe sepse kjo betejë është më e vështira nga të gjitha këto beteja që kemi bërë deri tani. Rezultatet e arritura deri më tani flasin vetë krahasuar me të shkuarën. Këto janë javët e apelit të fundit nga çdokush që nuk dëshiron probleme me ligjin. Nuk do të hezitojmë të ndëshkojmë askënd as brenda Doganave dhe Tatimeve.” tha në fjalën e tij Kryeministri
