Kryeministri Edi Rama deklaroi të premten se projektligji “Për arsimin e lartë” rrit ndjeshëm autonominë për universitetet.
Gjatë fjalës së tij në ceremoninë e diplomimit të studentëve të Universitetit të New York Tirana, që u zhvillua në hotel Sheraton, kryeministri Rama theksoi se “ajo çka ligji i ri i arsimit të lartë ka në të gjithë boshtin e tij është vullneti për të mos bërë kompromis me dijen dhe me cilësinë e arsimit të lartë dhe sfida që kjo reformë rrënjësore e arsimit të lartë merr përsipër është që të mobilizojë të gjitha burimet e shoqërisë në shërbim të këtij vizioni zhvillues”.
“Së pari na duhet të optimizojmë financat publike, para të të gjithë taksapaguesve shqiptarë me arsim të lartë apo jo, të rinj apo të moshuar, persona që mund të përfitojnë apo jo nga universiteti dhe që janë para që ndahen mënjanë çdo vit për universitetin”, nënvizoi Rama.
Kreu i qeverisë u shpreh se “ne jemi të bindur se është koha që të mundësojmë që asnjë qindarkë nga këto para të mos shkojë dëm dhe çka është më e rëndësishmja këto para të investohen në atë mënyrë që të na kthehen mbrapsht maksimumin e mundshëm të vlerës”.
Këto reforma, vijoi ai, i bëjmë në dy mënyra, financimi për universitetet publike, pra paratë që shteti i jep universitetit do të jepen tashmë në bazë të treguesve të performancës. “Kjo do të thotë që universitetet që tërheqin studentë më të mirë, që i përgatisin më mirë studentët, që kanë nivel më të lartë të punësimit të të diplomuarve të tyre, që marrin pjesë më shumë në projekte ndërkombëtare, do të kenë më shumë mbështetje nga fondet publike”, nënvizoi Rama.
Kryeministri vuri në dukje se kjo do t’i shtyjë universitetet të kenë interes të drejtpërdrejtë që të jenë cilësor, që të kenë staf cilësor, që t’i përgatisin studentët në mënyrë cilësore dhe jo thjesht që t’i kalojnë
