Kryeministri Edi Rama deklaron se lufta ndaj informalitetit ka hyrë në një fazë të re, teksa shifrat në rritje të eksporteve janë një shenjë inkurajuese për ekoniminë e vendit. Në një takim me përfaqësuesit e bizneseve të mëdha të eskportuesve, Rama tha se niveli i eksporteve ka njohur një rritje prej 5.2 % në 12 mujorin e vitit 2015.
“Shqipëria ka eksportet më të larta në rajon dhe kjo gjë na inkurajon. Gjithashtu, ka rritje të eksporteve me rajonin, pasi rritja e përgjithshme është edhe me BE-në. Eksportet me Kosovën janë më të larta se anjëherë dhe kur kjo ndodh në kushte vështirësish të mëdha për shkak të tkurrjes së tregjeve, nuk ka se si të mos ndihemi mirë” – u shpreh Rama.
Rama tha se qeveria ka ndërmend që të evitojë vizitat e tepërta dhe abuzive nëpër bizneset eksportuese. Kryeministri theksoi se tashmë kemi hyrë në një fazë të re me kontrollin e bizneseve mbi bazë risku.
“Do të evitojmë vizitat abuzive të tatimorëve nëpër subjekte. Duam të shmangim tmerrin që gjithfarë agjencish të vijnë dhe të bëjnë vizita për lloj-lloj përrallash që marrin kohë dhe ju stresojnë”- deklaroi Kryeministri.
