Kryeministri Edi Rama deklaroi sot se “ne jemi shumica që kemi taksuar më fort se gjithë të tjerët ata që fitojnë më shumë”.
Në fjalën e tij në Kuvend, ku po votohet për projektligjin për vlerën mbi tatimin e shtuar, kryeministri Rama theksoi se “nuk duam të ndodhë një katastrofë e dytë pas asaj të ’97 pikërisht kur morëm mandatin dhe ishim në prag të një falimentimi të plotë për të cilën na u desh të thërrisnim Fondin Monetar Ndërkombëtar (FMN) dhe na u desh të nisnim një periudhe të vështirë reformash, që nuk ka nevojë ti numëroj”.
“Ajo që është shumë e rëndësishme të mos harrohet është se sidoqoftë pavarësisht se u futëm në atë lloj cikli reformash të vështira ne i qëndruam qysh në buxhetin e parë premtimit për të kaluar nga taksa e sheshtë që ishte një grabitje e mirëfilltë e atyre që fitojne më pak tek taksimi i ndershëm kush fiton më shumë paguan më shumë”, nënvizoi Rama.
Sot, vijoi ai, është mirë të rikujtojmë se pavarësisht se çfarë thuhet ne jemi shumica që kemi taksuar më fort se gjithë të tjerët ata që fitojnë më shumë.
“Kemi taksuar më shumë biznesin, ata të cilët konsiderohen sipërmarrësit e mëdhenj që quhen rëndom me një shprehje ‘oilgarkët e mëdhenj’, sot paguajnë më shumë se ç’kanë paguar në të gjitha periudhat e zhvillimeve demokratike, kontribuojnë në buxhetin e shtetit më shumë se ndonjëherë tjetër , ndërkohë që ata që ftojnë më pak biznesi i vogël sot paguan më pak se ç’ka paguar ndonjëherë në zhvillimet demokratike”, theksoi Rama.
Kreu i qeverisë u shpreh se “kur të më tregoni ndonjë vend që e takson 0 biznesin e vogël deri në 5% atëherë hajde të diskutojmë si ta bëjmë më pak, 0 deri në 5% me xhiro 140 mijë dollarë në vit. Kur të ma gjeni një biznes me xhiro 140 mijë dollarë në vit në Serbi, Mal të Zi , Maqedoni, Kosovë, Bosnje dhe kudo të doni tjetër në rajon, po te doni ngjituni më lart ose zbrisni më poshtë edhe në Greqi, që taksohet vetëm 5% atëherë hajdeni si ta relaksojmë më shumë”.
/A.Rada
