Kryeministri Edi Rama, në rubrikën “Sy m’sy” deklaroi se opozita është një kënetë e drejtuar nga një buf dhe shtoi se demokratët duhet të hapin sytë për ta larguar Sali Berishën nga partia e tyre.
Si shembull solli të rinjtë e FRPD-së në Vlorë.
“Do të flas për bufin e kënetës deri në 9 maj, që është dhe Dita e Europës. Flas për ata të shurdhuar që nuk shohin se nuk kanë një lider, por një buf kënete. E tregoi shumë qartë praktika shumë hipokrite, skuthe dhe e pabesë e primareve. Sa e sa demokratë besuan se u erdhi dita të vlerësohen për atë që janë, u zhgënjyen se u përdorën për një propagandë hipokrite dhe u lanë jashë. Simboli i tyre është fituesi i primareve të Tiranës, që as nuk e njoh dhe s’kam dyshim që është kundër meje, por fitoi dhe e hodhën jashtë”, tha Rama.
“Doli i pari dhe nuk gjendet kund në listë. Këtë kanë votuar vajzat dhe djemtë e Forumit Rinor të PD-së Vlorë që masivisht u shkëputën dhe u bashkuan me mua dhe kanë një person që i përfaqëson, pedagogia Zamira, për të arritur një qëllim shumë më të madh. Ata nuk janë socialistë, mund të mos bëhen kurrë socialistë, por janë pjesë e jona. Shqipëria që duam në BE është përtej ndasive, ndarjeve e ideologjive”, shtoi kreu i qeverisë.
