Nuk kanë munguar as ditën e sotme video-postimet në distancë mes kreut të mazhorancës Edi Rama dhe atij të Koalicionit Euroatlantik, ish-kryetarit të PD-së, Lulzim Basha.
Kryeministri i është përgjigjur Bashës pas “zgjimit në mesnatë” që i bëri dhe pyetjes se “ku i ke shokët”, me një tjetër postim në rrjetin social Facebook, me nënshkrimin: “Jepi gaz!”
Duke përdorur në sfond gjatë udhëtimit me mjet, hitin muzikor ‘Jepi gaz’ të Ronela Hajatit, Rama vijon me thumbimet në distancë dhe virtuale.
Teksa vendos thirrjen e Bashës që ‘të dilte në fushë’ apo se ‘kishte nxjerrë doktorin për të sulmuar Bashën’, kreu i mazhorancës i përgjigjet se “nga frika u futa te listat e mbyllura, pasi e ndjeu edhe bufi plak, duke ulur qepenin, prej frikës ndaj tij (Bashës)”.
Rama i ka gjetur një epitet të ri, duke e thirrur edhe “Lul tsunami”, teksa i kujtoi me ironi edhe “shkatërrimet elektorale” që i kishte bërë në 4 fushata radhazi, 2015, 2017, 2019 dhe 2021.
“Më ka marrë malli mo burrë, të ma këndosh himnin aty poshtë”, i thotë Rama, teksa vendos sërish në sfond një pjesë të deklaratës së Bashës që të dilte në fushë dhe të mos linte vetëm Sali Berishën.
“Jo mo burrë, u ngrejt era euroatlantike dhe po shkunden puplat te këneta. Më keni bërë si dashnore kolektive me doktorin, ai thotë jam i “Lul bravës”, ti thuaj jam i doktor bufit, si shprehja e Robert Çamçakëzit”, shprehet kryeministri.
Teksa në fund e pyet se “Gaz ballokumja i kujt është (për Gazment Bardhin), se më çmende, thoshe është i imi, i imi! Mos harro, të përshëndes (vendos këngën në sfond), numrin 5, bashkë me Hysenin dhe Pëllumbin”, e mbyll Rama.
Video-postimi i plotë i Edi Ramës në Facebook:
Basha- O Rameee, çfarë frikacaku je me burë, ke vënë doktorin me më sulmu mu…! A ça je, ça je, mërzit doktorin që i sulmoi partnerin eee…?!
Rama- Ahaha… e ndiu Lul e ndiu… E ndjeu bufi plak, atë që ndjeva unë kur u futa me vrap aty te lista e mbyllur! Sa e pashë që u zgjove, pupupu ça stresi, ik thashë, ik, ik mbyllu në listë aty, mbyll qepenin se të shkatërroi prapë Lul tsunami, siç më shkatërrove më 2015, 2017, 2019, 2021, eh ça më ke bë, ça më ke bë. Po që më ka marrë malli mo burrë të ma këndosh pak himnin aty poshtë.
Basha: Po dil vetë në fush mo burrë… doktori 81 vjeç!
Rama: Unë të dalë në fushë? Mos mo burrë, tani që dole ti me Hysen Gjurën dhe Pëllumb Seferin, jo mo vlla. Le të merret bufi me ty tani, se e mori lehtë këtë punë. Po kam frikë se është vonë, u ngrejt era euroatlantike dhe po shkunden puplat te këneta, po shkunden puplat.
Basha: Dil vetë në fushë, thuj doktorit merrem unë me Bashën, siç jeni marrë më përpara të dy me mua…!
Rama: Eeee, vallai këtu s’di ça të them tani, se më keni bërë si dashnore kolektive kur thoshte ai, robert çamçakëzi, e mban mend bertin apo jo, te ai filmi “Horizonte të hapura”, ju mbyti xhelozia ju mbyti… ti thua jam i doktor bufit, ai thotë jam i lul bravës. Ore nuk e di, po ai Gaz Ballokumja i kujt është mor Lul, pash Zotin se më para më çmendje, gazi është i imi, Gazi është i imi, s’ka si Gazi im… ahahah! E mor artist kur do të të kuptojë ty këneta do jetë tharë komplet. Por ti, ti, mos ma ndaj mendjen e lehtë dhe ec aty, jepi gaz! Të përshëndes! (vendos këngën ‘Jepi gaz’ në sfond)… Dhe në fund fare mos harro, 5, numrin 5, bashkë me Hysenin dhe Pëllumbin!
