Kreu i qeverisë, Edi Rama ishte në Shijak dhe në Durrës, ku ka parë nga afër ecurinë e procesit të rindërtimit në zonën më të prekur nga tërmeti i 26 Nëntorit të 2019.
Në Durrës riparimi i 615 pallateve të dëmtuar në nivelin DS1, DS2 DS3 po vijon, por kreu i qeverisë ka kërkuar përshpejtim të punës. Lajmi më i mirë vjen nga Shijaku, ku kanë nisur të ndërtohen 9 pallate 7 katëshe, të cilat do të strehojnë 163 familje.
150 banesa individuale janë ndërtuar deri tani në Shijak. Disa banorëve në Xhafëzotaj, Rama zgjodhi t’ua japë vetë çelësat e shtëpive të reja.
Edhe në Maminas, pati banorë që hynë në shtëpi të reja. Ministri i Rindërtimit, Arben Ahmetaj zgjodhi këtë moment për të sqaruar se numri i personave në çadra po ulet.
Rama siguroi se të gjithë të prekurit e tërmetit do të vijojnë të marrin bonusin e qirasë, deri në ditën që do të hyjnë në shtëpitë e tyre.
/a.r
