Kryeministri Edi Rama, në një deklaratë për mediat të mbajtur paraditen e së enjtes, ka prezantuar masat e marra nga qeveria për reduktimin e burokracive në institucionet shtetërore.
Janë së paku 24 dokumente që hiqen nga praktika burokratike në zyrat e shtetit. Po ashtu, në vijim do të pastrohen edhe të tjera dokumente, të cilat në çdo rast që shteti i këkon nga qytetari, duhet t’i sigurojë po vetë nëpunësi oinline.
Kryeministri u kërkoi publikisht qytetarëve të refuzojnë çdo kërkesë të çdo zyre për çertifikata në letër.
“Duke filluar nga çertifikata personale e familjare. Qytetarët të refuzojnë çdo kërkesë të çdo zyre për çertifikatë dhe lekë dhe të kërkojnë aty në sportel që cilido që u kërkon një gjë të tillë, ta bëjë vet. Çertifikatat personale, çertifikatat familjare janë aty. Vërtetimet e pensionit po ashtu. Konfirmimet për gjendjen aktive të mjetit, vërtetimet për lejet e ndërtimit, kopje e kartelës së pasurisë janë të gjitha dokumente që janë aty.
Aty ku këto dokumente kërkohen, i takon nëpunësit përkatës që t’i sigurojë këto për llogari të qytetarit“, tha Rama.
Kreu i qeverisë theksoi se heqja e burokracive të tilla shkurton 56 vjet pritje të qytetarëve për të marrë dokumente. Pjesa më e madhe e vërtetimeve dhe dokumenteve ofrohen me detyrim nga shteti përmes portalit “e-Albania” dhe administratës i është dërguar me shkrim urdhri.
Rama ka deklaruar se masat në fjalë do të ndikojnë edhe tek rritja ekonomike, e cila, sipas tij, lidhet me uljen drastike të peshës së burokracisë tek shpatullat e njerëzve.
“Ndërkohë, ministri i Financave dhe Ekonomisë ka urdhëruar të gjitha institucionet e varësisë që të mos kërkojnë më dokumentet e mëposhtme:
Çertifikatën e regjistrimit
Ekstraktin historik të kompanisë
Vërtetimin për regjistrin e investitorit
Vërtetim për individë të paregjistruar
Vërtetim statusi
Vërtetim xhiro për 3 vitet e fundit
Dëshmi penaliteti
Dhe të gjitha llojet e dokumenteve që gjenerohen nga sistemi i gjendjes civile.
Për të gjitha këto është shteti, administrata që duhet të marrë masa t’i garantojë përmes sistemit “e-Albania”.
Kjo do të thotë 56 vjet pritje që konsumohen nga qytetarët, kompanitë thjesht dhe vetëm për të marrë vërtetime”, tha Kryeministri Edi Rama. /a.ç
