Pavarësisht ultimatumit të Partisë Demokratike për të mos marrë pjesë në zgjedhje, kryeministri Edi Rama ka deklaruar qartë dhe prere se nuk do të ketë as qeveri teknike dhe as shtyrje të zgjedhjeve. Rama deklaroi se, edhe pse mospjesëmarrja e opozitës në zgjedhje do të ishte një anomali, data e vetme e mbajtjes së zgjedhjeve është 18 qershori, ashtu siç e parashikon ligji dhe zgjedhjet do të zhvilloheshin edhe pa opozitën.
“Nuk do të ketë as qeveri teknike dhe as shtyrje të zgjedhjeve”, kjo ka qenë deklarata e kryeministrit Rama në komunikimin javor. “Sot do të flas për krizën false politike të nisur nga PD. Ajo kërkon të fusë vendin në krizë politike. S’ka për të ardhur ndonjëherë oferta për qeveri teknike. S’ka për të ardhur oferta për shtyrje të zgjedhjeve”, u shpreh Rama.
Kryeministri u shpres se PD kërkon të fusë vendin në krizë, por sipas tij, kjo nuk është kriza e Shqipërisë, por kriza e një partie pa lidership. Rama deklaroi se çadra në bulevard është një kështjellë rëre. Ai deklaroi se protesta e opozitës është kundër reformës në drejtësi dhe zgjedhjeve të qershorit. Sipas kryeministrit çadra është ngritur që PD të mbrohet nga vettingu.
“Kjo nuk është kriza e Shqipërisë. Kjo është kriza e një partie pa lidership. Kjo është kriza e një katundi të izoluar politik dhe mediatik. Kjo është kriza e gogolmakutëve të sistemit të drejtësisë. Pd ka zgjedhur të lëshojë ultimatum dhe thotë se nëse nuk zbatohen do fusë vendin në kaos”, deklaroi Rama.
Rama komentoi edhe vizitat e disa senatorëve të huaj në çadrën e PD.
“Të huaj, jo dashamirës të këtij kombi, i bashkohen çadrës. Gjykatës të korruptuar dhe komentatore të paguar, mbeshtesin çadrën e PD.
Rama deklaroi se është i gatshëm të dialogojë me opozitën, madje edhe në çadrën e protestës, theksoi ai.
“Jam i gatshëm të takohem edhe në çadër nëse duan për te dialoguar
“Jemi gati per dialog, për ndërhyrje në kodin zgjedhor. Votojmë çdo gjë që nuk bie ndesh me osbe-odihr”
Rama deklaroi se kjo qeveri nuk mund të prishë kontratën me popullin, ndaj do të vazhdojë me reformat.
“Kjo qeveri nuk mund të prishe kontraten me popullin, kohëzgjatja është deri me 18 qershor, na e imponon kushtetuta. Vullneti popullor me vote e ka vendosur kush qeveris. Qeveria do vazhdojë punën e nisur për Shqipërinë
As opozita, as qeveria nuk kanë gjë në dorë lidhur me daten e zgjedhjeve, e ka përcaktuar qartë ligji.
Ndër të tjera kryeministri Rama i bëri thirrje Partisë Demokratike që të kthehet në Parlament për të përmbyllur procesin e Vetting-ut. Një kërkesë që ka qenë në formën e këshillës, pasi sipas Ramës mos pjesëmarrja e PD në këtë proces do ta fundoste ende pa filluar fushata elektorale.
Në fund Rama u shpreh i bindur se opozita do të marrë pjesë në zgjedhje dhe do të kthehet në kuvend për të votuar vettingun.
“Jam i bindur se PD do të futet në zgjedhje dhe do të kthehet në kuvend për të votuar vettingun”
https://www.facebook.com/edirama.al/videos/10154575468131523/
a.ç
