Kryeministri Edi Rama ka zgjedhur të ju përgjigjet kritikave të deputetit të tij Ben Blushi, duke e bërë këtë nga Panairi i Punës. Në fjalën e tij Rama, duke iu referuar Blushit si “socialistit”, tha se shifrat e punësimit flasin qartë për 93 mijë persona më shumë të regjistruar pranë sigurimeve shoqërore.
Sipas Ramës, Blushi mund të ketë shifrat e tij, por shqiptarët nuk janë budallenj dhe e kuptojnë që ndryshimi po vjen, ndërsa i cilësoi deklaratat e deputetit si një politikë e ulët. Megjithatë kryeministri nënvizoi se kushdo që ka menduar se rilindja do të vinte vetëvetiu me ndryshimin e flamujve të qeverisë, ka parë nj realitet që nuk ekziston.
Rama përsëriti vullnetin e qeverisë që ai drejton për a kthyer Shqipërinë në drejtimin e duhur në të gjitha aspektet, por se kjo kërkon shumë punë dhe “kirirugji për të hequr kancerin”.
“Shqipëria sot po merr kthesën në rrugën e duhur. Kush ka imagjinuar gabimisht se Shqipëria e rilindur ishte një punë e lehtë dhe mjaftonte të ndryshonin qeveritë, flamurin e partisë që qeveris dhe rilindja do të ndodhte vetë, ka parë një gjë që nuk ekziston. Kush përpiqet që thotë ku i keni këto, ku i keni ato i merr shqiptarët për budallenj. Duke shfrytëzuar problemet reale dhe një dëshpërim që është real të bëjë politikën e llojit më të ulët, politikën që nuk ka asnjë ide, asnjë program, asnjë alternativë, por ka vetëm një, rrugën e shpif-shpif se diçka do të mbetet dhe gënje-gënje se me siguri do të gjenden njerëzit që do ta hanë gënjeshtrën. Rezultatet e reformave nuk vijnë as të gjitha menjëherë dhe as kur procesi është në fazën e operacionit të vet ashtu siç vijnë kur organizmi fillon të gjenerohet. Sot ka një fakt, sot bilanci është i qartë. Janë në punë të regjistruar dhe i paguajmë taksa këtij shteti 93 mijë persona më shumë seç ishin 1 vit më parë. Shqipëria është kthyer në drejtimin e duhur, por ka ende shumë-shumë punë për të bërë. Kanceri nuk zhduket me propagandë, as me terapi. Kanceri për tu zhdukur kërkon operacion të thellë dhe një vullnet të hekurt.” tha Rama
Redaksia Online
(JavaNews.al)
